ന്യൂഡൽഹി: വിദേശരാജ്യങ്ങളിൽ നിന്ന് ഇന്ത്യക്കാരെ നാടുകടത്തുന്നതുമായി ബന്ധപ്പെട്ട നിർണ്ണായക കണക്കുകൾ വിദേശകാര്യ മന്ത്രാലയം പുറത്തുവിട്ടു. കഴിഞ്ഞ അഞ്ച് വർഷത്തെ കണക്കുകൾ പരിശോധിക്കുമ്പോൾ, അമേരിക്കയെക്കാൾ കൂടുതൽ ഇന്ത്യക്കാരെ നാടുകടത്തിയത് ഗൾഫ് രാഷ്ട്രമായ സൗദി അറേബ്യയാണെന്ന് വ്യക്തമാകുന്നു. വീസ കാലാവധി കഴിഞ്ഞിട്ടും രാജ്യത്ത് തുടരുന്നവർക്കും നിയമലംഘനം നടത്തുന്നവർക്കും എതിരെ സൗദി കർശന നടപടി സ്വീകരിച്ചതാണ് ഈ വർദ്ധനവിന് കാരണം. അതേസമയം, അമേരിക്കയിൽ നിന്ന് പ്രധാനമായും പുറത്താക്കപ്പെടുന്നത് അനധികൃതമായി അതിർത്തി കടന്നെത്തുന്നവരാണ്.(Saudi Arabia ahead of US in deporting Indians, Ministry of External Affairs releases figures)
2021 മുതൽ 2025 വരെയുള്ള കാലയളവിൽ ഏറ്റവും കൂടുതൽ ഇന്ത്യക്കാരെ പുറത്താക്കിയത് സൗദി അറേബ്യയാണ്. 2021-ൽ 8,887 പേരെയാണ് സൗദി തിരിച്ചയച്ചത്. തൊട്ടടുത്ത വർഷമായ 2022-ൽ ഇത് 10,277 ആയി ഉയർന്നു. 2023-ൽ 11,486 പേരെയും 2024-ൽ 9,206 പേരെയും സൗദി നാടുകടത്തി. 2025-ൽ ഇതുവരെയുള്ള കണക്കുകൾ പ്രകാരം 7,019 ഇന്ത്യക്കാരാണ് സൗദിയിൽ നിന്ന് പുറത്തായത്. വീസ നിയമങ്ങൾ ലംഘിക്കുന്നവർക്കെതിരെ സൗദി അധികൃതർ പരിശോധനകൾ കർശനമാക്കിയതാണ് ഈ വർദ്ധനവിന് പിന്നിലെ പ്രധാന ഘടകം.
സൗദിയുമായി താരതമ്യം ചെയ്യുമ്പോൾ അമേരിക്കയിൽ നിന്ന് നാടുകടത്തപ്പെടുന്ന ഇന്ത്യക്കാരുടെ എണ്ണം കുറവാണെങ്കിലും സമീപകാലത്ത് ഇവിടെ വലിയ വർദ്ധനവ് രേഖപ്പെടുത്തിയിട്ടുണ്ട്. 2021-ൽ 805 പേരെയും 2022-ൽ 862 പേരെയും 2023-ൽ 617 പേരെയും യുഎസ് നാടുകടത്തി. എന്നാൽ 2024-ൽ ഈ സംഖ്യ 1,368 ആയി വർദ്ധിച്ചു. 2025-ൽ ഇതുവരെ മാത്രം 3,414 ഇന്ത്യക്കാരെയാണ് യുഎസ് തിരിച്ചയച്ചത്.
സൗദിക്കും യുഎസിനും പുറമേ മറ്റ് ഏഷ്യൻ രാജ്യങ്ങളും നിയമലംഘനം നടത്തുന്ന ഇന്ത്യക്കാർക്കെതിരെ നടപടിയെടുക്കുന്നുണ്ട്. കഴിഞ്ഞ അഞ്ച് വർഷത്തിനിടയിൽ മ്യാൻമർ 1,591 പേരെയും മലേഷ്യ 1,485 പേരെയും ബഹ്റൈൻ 764 പേരെയും നാടുകടത്തിയതായും വിദേശകാര്യ മന്ത്രാലയത്തിന്റെ കണക്കുകൾ വ്യക്തമാക്കുന്നു.