കരിയറിലും വ്യക്തിജീവിതത്തിലും വലിയ മാറ്റങ്ങൾക്കും നേട്ടങ്ങൾക്കും സാക്ഷ്യം വഹിച്ച 2025-നോട് ഹൃദയസ്പർശിയായ കുറിപ്പിലൂടെ നന്ദി പറഞ്ഞ് തെന്നിന്ത്യൻ താരം സാമന്ത റൂത്ത് പ്രഭു. ആരോഗ്യപ്രശ്നങ്ങളും വ്യക്തിപരമായ വെല്ലുവിളികളും നിറഞ്ഞ ഒരു കാലഘട്ടത്തിന് ശേഷം സാമന്തയുടെ ശക്തമായ തിരിച്ചുവരവിനാണ് 2025 സാക്ഷ്യം വഹിച്ചത്.
"നന്ദിയുടെ ഒരു വർഷം" എന്ന അടിക്കുറിപ്പോടെയാണ് താരം തന്റെ ഇൻസ്റ്റാഗ്രാമിൽ ചിത്രങ്ങൾ പങ്കുവെച്ചത്. തന്റെ ജീവിതത്തിലെ സമാധാനം തിരിച്ചുപിടിച്ച വർഷമായിരുന്നു ഇതെന്ന് സാമന്ത ചിത്രങ്ങളിലൂടെ വ്യക്തമാക്കുന്നു. ആരാധകർ ഏറെ ആവേശത്തോടെയാണ് താരത്തിന്റെ ഈ കുറിപ്പ് ഏറ്റെടുത്തിരിക്കുന്നത്.
ജീവിതപങ്കാളിയെ കണ്ടെത്തിയതും വിവാഹിതയായതും സാമന്തയെ സംബന്ധിച്ച് ഈ വർഷത്തെ ഏറ്റവും വലിയ സന്തോഷമായിരുന്നു. വിവാഹനിമിഷങ്ങളുടെ മനോഹരമായ ചിത്രങ്ങൾ താരം പോസ്റ്റിൽ ഉൾപ്പെടുത്തിയിട്ടുണ്ട്. മൈയോസിറ്റിസ് (Myositis) ബാധിച്ചതിനെത്തുടർന്ന് താരം സിനിമയിൽ നിന്ന് വിട്ടുനിന്നിരുന്നു. എന്നാൽ 2025-ൽ ആരോഗ്യസ്ഥിതി മെച്ചപ്പെടുകയും കഠിനമായ വർക്കൗട്ടുകളിലൂടെ താരം പഴയ കരുത്ത് വീണ്ടെടുക്കുകയും ചെയ്തു.
അഭിനയത്തിന് പുറമെ നിർമ്മാണ രംഗത്തേക്കും താരം ചുവടുവെച്ചു. തന്റെ പുതിയ പ്രൊഡക്ഷൻ ഹൗസിന്റെ പ്രവർത്തനങ്ങൾ ആരംഭിച്ചത് കരിയറിലെ വലിയൊരു ചുവടുവെപ്പായിരുന്നു.
കഠിനാധ്വാനത്തിലൂടെയും പോസിറ്റീവ് മനോഭാവത്തിലൂടെയും പ്രതിസന്ധികളെ മറികടന്ന സാമന്തയുടെ ഈ കുറിപ്പ് സോഷ്യൽ മീഡിയയിൽ വൈറലായിരിക്കുകയാണ്. ആയിരക്കണക്കിന് ആരാധകരാണ് താരത്തിന് ആശംസകളുമായി എത്തുന്നത്.