ചെന്നൈ: തമിഴ്നാട് നിയമസഭയിൽ നയപ്രഖ്യാപന പ്രസംഗം നടത്താതെ ഗവർണർ ആർ.എൻ. രവി ഇറങ്ങിപ്പോയ നടപടി സംസ്ഥാനത്തെ ജനങ്ങളെ അവഹേളിക്കുന്നതാണെന്ന് മുഖ്യമന്ത്രി എം.കെ. സ്റ്റാലിൻ (RN Ravi Assembly Walkout). ഗവർണർമാർ നയപ്രഖ്യാപന പ്രസംഗം ഒഴിവാക്കുന്നത് തടയുന്നതിനായി ഭരണഘടനാ ഭേദഗതി കൊണ്ടുവരാൻ കേന്ദ്രസർക്കാരിൽ സമ്മർദ്ദം ചെലുത്തുമെന്ന് അദ്ദേഹം പ്രഖ്യാപിച്ചു. ഗവർണറുടെ നടപടി ഭരണഘടനാ ലംഘനമാണെന്നും സഭയുടെ കീഴ്വഴക്കങ്ങൾ അദ്ദേഹം പാലിച്ചില്ലെന്നും സ്റ്റാലിൻ കുറ്റപ്പെടുത്തി.
നയപ്രഖ്യാപന പ്രസംഗം ഒഴിവാക്കി ഗവർണർ സഭ വിട്ടതിന് പിന്നാലെ, സർക്കാർ തയ്യാറാക്കിയ പ്രസംഗം സഭാരേഖകളിൽ ഉൾപ്പെടുത്തിയതായി കണക്കാക്കണമെന്ന പ്രമേയം മുഖ്യമന്ത്രി അവതരിപ്പിച്ചു. പ്രസംഗത്തിന്റെ തമിഴ് പതിപ്പ് സ്പീക്കർ എം. അപ്പാവു സഭയിൽ വായിച്ചു. 2022-ൽ മാത്രമാണ് ആർ.എൻ. രവി സർക്കാർ നൽകിയ പ്രസംഗം പൂർണ്ണരൂപത്തിൽ വായിച്ചത്. കഴിഞ്ഞ മൂന്ന് സമ്മേളനങ്ങളിലും പ്രസംഗം വായിക്കാതെ അദ്ദേഹം ഇറങ്ങിപ്പോകുകയായിരുന്നു. ഗവർണറുടെ ഈ നിലപാട് ജനാധിപത്യ വിരുദ്ധമാണെന്ന് ഡിഎംകെയും സഖ്യകക്ഷികളും ആരോപിച്ചു.
ദേശീയഗാനത്തോടുള്ള അനാദരവ് ചൂണ്ടിക്കാട്ടിയാണ് താൻ ഇറങ്ങിപ്പോയതെന്ന് രാജ്ഭവൻ പിന്നീട് വിശദീകരിച്ചു. സഭ തുടങ്ങുമ്പോൾ ദേശീയഗാനം ആലപിച്ചില്ലെന്നും തന്റെ മൈക്ക് ഓഫ് ചെയ്തതായും ഗവർണർ ആരോപിച്ചു. എന്നാൽ തമിഴ്നാട് നിയമസഭയുടെ പതിവനുസരിച്ച് സഭ തുടങ്ങുമ്പോൾ തമിഴ് തായ് വാഴ്ത്തും സമാപനത്തിൽ ദേശീയഗാനവുമാണ് ആലപിക്കാറുള്ളതെന്ന് സ്പീക്കർ മറുപടി നൽകി. ഗവർണറെ ബിജെപിയും അണ്ണാ ഡിഎംകെയും പിന്തുണച്ചപ്പോൾ, സംസ്ഥാനത്തിന്റെ പരമാധികാരത്തിന് മേലുള്ള കടന്നുകയറ്റമാണിതെന്ന് ഭരണപക്ഷം ആഞ്ഞടിച്ചു.
Tamil Nadu Chief Minister M.K. Stalin has announced plans to push for a constitutional amendment to prevent Governors from skipping policy addresses after Governor R.N. Ravi walked out of the Assembly. Stalin accused the Governor of insulting the people of Tamil Nadu and violating constitutional norms. While the Governor cited the absence of the National Anthem at the start of the session as his reason for the walkout, the Speaker clarified that the state follows a long-standing tradition of playing the State Song at the beginning and the National Anthem at the end.