ബിലാസ്പൂർ: ഹിമാചൽ പ്രദേശിലെ ബിലാസ്പൂരിൽ വിരമിച്ച സൈനികനെ ഡിജിറ്റൽ അറസ്റ്റിലൂടെ കബളിപ്പിച്ച് 98 ലക്ഷം രൂപ കവർന്നു (Digital Arrest). സിബിഐ, ആർബിഐ ഉദ്യോഗസ്ഥരാണെന്ന് പരിചയപ്പെടുത്തി വീഡിയോ കോളിലൂടെ എത്തിയ തട്ടിപ്പുകാർ, ഒരു വ്യാജ കോടതി തന്നെ സൃഷ്ടിച്ച് സൈനികനെ വിചാരണ ചെയ്തായിരുന്നു ഈ തുക തട്ടിയെടുത്തത്. ഡിസംബർ 15 മുതൽ 30 വരെ നീണ്ട 15 ദിവസമാണ് ഭീഷണിപ്പെടുത്തി ഇദ്ദേഹത്തെ ഇവർ സൈബർ നിരീക്ഷണത്തിൽ പാർപ്പിച്ചത്.
പണം വെളുപ്പിക്കൽ കേസിലും ലഹരിമരുന്ന് കേസിലും ഉൾപ്പെട്ടിട്ടുണ്ടെന്നും അറസ്റ്റ് വാറണ്ട് ഉണ്ടെന്നും പറഞ്ഞായിരുന്നു തുടക്കം. തുടർന്ന് വീഡിയോ കോളിലൂടെ വ്യാജ ജഡ്ജിയെയും ഉദ്യോഗസ്ഥരെയും കാണിച്ചു. രഹസ്യ അന്വേഷണത്തിന്റെ ഭാഗമാണെന്നും വിവരങ്ങൾ പുറത്തുപറഞ്ഞാൽ ജയിലിലാകുമെന്നും ഭീഷണിപ്പെടുത്തി വിവിധ അക്കൗണ്ടുകളിലേക്ക് പണം നിക്ഷേപിപ്പിക്കുകയായിരുന്നു. പോലീസ് സ്റ്റേഷനിൽ നേരിട്ടെത്തുന്നതിനോ ഫോൺ സ്വിച്ച് ഓഫ് ചെയ്യുന്നതിനോ ഇവർ അനുവദിച്ചില്ല.
മണ്ടി സൈബർ ക്രൈം പോലീസ് സംഭവത്തിൽ കേസെടുത്തിട്ടുണ്ട്. മുൻ സൈനികന്റെ പരാതിയിൽ അന്വേഷണം തുടരുകയാണ്. ഡിജിറ്റൽ അറസ്റ്റ് എന്നൊരു നിയമപരമായ നടപടി നിലവിലില്ലെന്നും, ഇത്തരത്തിൽ ഉദ്യോഗസ്ഥരെന്ന വ്യാജേന ഭീഷണിപ്പെടുത്തി പണം ആവശ്യപ്പെട്ടാൽ ഉടൻ സൈബർ ഹെൽപ്പ് ലൈൻ നമ്പറായ 1930-ൽ വിളിക്കണമെന്നും പോലീസ് നിർദ്ദേശിച്ചു.
A retired soldier in Bilaspur was swindled of Rs 98 lakh after falling victim to an elaborate "digital arrest" scam that lasted 15 days. Scammers posed as high-ranking officials and orchestrated fake court hearings via video calls to intimidate the veteran into transferring his savings. Himachal Pradesh Police are currently investigating the case and have urged the public to remain vigilant against such sophisticated cyber-attacks.