ചെന്നൈ: ഇന്ത്യൻ സിനിമയിലെ രണ്ട് ഇതിഹാസങ്ങൾ കൈകോർക്കുന്ന പുതിയ ചിത്രം 'തലൈവർ 173' ഔദ്യോഗികമായി പ്രഖ്യാപിച്ചു. കമൽ ഹാസന്റെ ഉടമസ്ഥതയിലുള്ള രാജ് കമൽ ഫിലിംസ് ഇന്റർനാഷണൽ (RKFI) ആണ് ചിത്രം നിർമ്മിക്കുന്നത്. 'ഡോൺ' എന്ന സൂപ്പർഹിറ്റ് ചിത്രത്തിന് ശേഷം സിബി ചക്രവർത്തി സംവിധാനം ചെയ്യുന്ന രണ്ടാമത്തെ ചിത്രമാണിത്.
രാജ് കമൽ ഫിലിംസ് 44 വർഷം പൂർത്തിയാക്കുന്ന വേളയിലാണ് ഈ പ്രഖ്യാപനം. കമൽ ഹാസൻ നിർമ്മിക്കുന്ന ചിത്രത്തിൽ രജനീകാന്ത് നായകനാകുന്നത് ഇതാദ്യമാണ്. യുവാക്കളുടെ ഹരമായ അനിരുദ്ധ് രവിചന്ദർ ആണ് ചിത്രത്തിന് സംഗീതം പകരുന്നത്. "എവെരി ഫാമിലി ഹാസ് എ ഹീറോ" (Every family has a hero) എന്നാണ് ചിത്രത്തിന്റെ ടാഗ്ലൈൻ.
2027 പൊങ്കൽ റിലീസ് ലക്ഷ്യമിട്ടാണ് ചിത്രം ഒരുങ്ങുന്നത്. റെഡ് ജയന്റ് മൂവീസ് ആണ് വിതരണം ഏറ്റെടുത്തിരിക്കുന്നത്.
നിലവിൽ നെൽസൺ സംവിധാനം ചെയ്യുന്ന 'ജയിലർ 2' (ഹുക്കും) എന്ന ചിത്രത്തിന്റെ തിരക്കിലാണ് രജനീകാന്ത്. ഇതിന് ശേഷം ഈ വർഷം ആദ്യ പകുതിയോടെ തന്നെ സിബി ചക്രവർത്തി ചിത്രത്തിൽ അദ്ദേഹം ജോയിൻ ചെയ്യും. ആർ. മഹേന്ദ്രനും കമൽ ഹാസനും ചേർന്നാണ് ചിത്രം നിർമ്മിക്കുന്നത്.
അഞ്ച് പതിറ്റാണ്ടിലേറെ നീളുന്ന കമൽ-രജനി സൗഹൃദത്തിന്റെ പുതിയൊരു നാഴികക്കല്ലായാകും ഈ കൊമേഴ്സ്യൽ എന്റർടൈനർ മാറുന്നത്. ആറ്റ്ലിയുടെ സംവിധാന സഹായിയായിരുന്ന സിബി ചക്രവർത്തി, രജനീകാന്തിനെ എങ്ങനെ വെള്ളിത്തിരയിൽ അവതരിപ്പിക്കും എന്ന ആകാംക്ഷയിലാണ് ആരാധകർ.