ന്യൂഡൽഹി: ഭർത്താവിനെ വെടിവെച്ചു കൊന്ന കേസിലെ പ്രധാന സാക്ഷിയായ 44-കാരിയെ ഡൽഹിയിൽ പട്ടാപ്പകൽ വെടിവെച്ചു കൊന്നു (Rachna Yadav Murder Delhi). നോർത്ത് വെസ്റ്റ് ഡൽഹിയിലെ ഷാലിമാർ ബാഗ് റെസിഡന്റ് വെൽഫെയർ അസോസിയേഷൻ പ്രസിഡന്റ് രചന യാദവ് ആണ് കൊല്ലപ്പെട്ടത്. ശനിയാഴ്ച രാവിലെ അയൽവാസിയെ സന്ദർശിച്ച് മടങ്ങുന്നതിനിടെയാണ് അക്രമിസംഘം രചനയെ തടഞ്ഞുനിർത്തി തലയ്ക്ക് വെടിവെച്ചത്.
2023-ൽ രചനയുടെ ഭർത്താവ് വിജേന്ദ്ര യാദവിനെ ഒരു സംഘം വെടിവെച്ചു കൊന്നിരുന്നു. ഈ കേസിലെ ഏറ്റവും പ്രധാനപ്പെട്ട സാക്ഷിയായിരുന്നു രചന. ഭർത്താവിന്റെ കൊലപാതക കേസിൽ വിചാരണ നടക്കാനിരിക്കെ മൊഴി നൽകുന്നത് തടയാനും കേസ് അട്ടിമറിക്കാനുമാണ് ഈ കൊലപാതകം ആസൂത്രണം ചെയ്തതെന്ന് പോലീസ് സംശയിക്കുന്നു. 2023-ലെ കേസിൽ അഞ്ച് പ്രതികൾ പിടിയിലായെങ്കിലും പ്രധാന പ്രതി ഭരത് യാദവ് ഇപ്പോഴും ഒളിവിലാണ്. ഭരത് യാദവാണ് തന്റെ അമ്മയുടെ കൊലപാതകത്തിന് പിന്നിലെന്ന് രചനയുടെ മകൾ ആരോപിച്ചു.
സ്പോർട്സ് ബൈക്കിലെത്തിയ രണ്ട് അക്രമികൾ രചനയെ വഴിയിൽ വെച്ച് തടയുകയും പേര് ചോദിക്കുകയും ചെയ്തു. രചന തന്റെ പേര് വെളിപ്പെടുത്തിയ ഉടൻ തന്നെ അക്രമി തോക്കെടുത്ത് തലയ്ക്ക് വെടിവെക്കുകയായിരുന്നു. രചന സംഭവസ്ഥലത്ത് വെച്ച് തന്നെ മരിച്ചു. സിസിടിവി ദൃശ്യങ്ങളിൽ പ്രതികളുടെ ദൃശ്യങ്ങൾ വ്യക്തമായി പതിഞ്ഞിട്ടുണ്ടെന്ന് പോലീസ് അറിയിച്ചു. ഒളിവിലുള്ള പ്രതി ഭരത് യാദവിനായി പോലീസ് തിരച്ചിൽ ഊർജ്ജിതമാക്കിയിട്ടുണ്ട്.
A 44-year-old woman, Rachna Yadav, who was the key witness to her husband’s 2023 murder, was shot dead at point-blank range in Delhi's Shalimar Bagh. Police suspect that the main accused from the previous case, who is currently at large, orchestrated the killing to silence her before her testimony in court. The incident has raised serious concerns regarding witness protection and safety in the national capital as multiple police teams track down the assailants captured on CCTV.