മാധ്യമസ്വാതന്ത്ര്യം തടയരുത്, പത്രത്തിന്റെ പ്രസിദ്ധീകരണം ഒരു കാരണവശാലും തടസ്സപ്പെടരുത്; പഞ്ചാബ് കേസരിയുടെ വൈദ്യുതി വിച്ഛേദിക്കാനുള്ള നീക്കത്തിന് സുപ്രീം കോടതിയുടെ സ്റ്റേ | Punjab Kesari

ന്യൂഡൽഹി: പ്രമുഖ പത്രഗ്രൂപ്പായ പഞ്ചാബ് കേസരിക്ക് (Punjab Kesari) വലിയ ആശ്വാസം നൽകിക്കൊണ്ട്, അവരുടെ പ്രിന്റിംഗ് പ്രസ്സുകളുടെ പ്രവർത്തനം തടസ്സമില്ലാതെ തുടരാമെന്ന് സുപ്രീം കോടതി ഉത്തരവിട്ടു. മലിനീകരണ നിയന്ത്രണ മാനദണ്ഡങ്ങൾ ലംഘിച്ചുവെന്ന് ആരോപിച്ച് പഞ്ചാബ് മലിനീകരണ നിയന്ത്രണ ബോർഡ് പ്രസ്സുകളിലേക്കുള്ള വൈദ്യുതി ബന്ധം വിച്ഛേദിക്കാൻ തീരുമാനിച്ചിരുന്നു. ഇതിനെതിരെ പത്രഗ്രൂപ്പ് സമർപ്പിച്ച ഹർജി പരിഗണിച്ച ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചാണ് അടിയന്തരമായി ഇടപെട്ടത്. പത്രത്തിന്റെ പ്രസിദ്ധീകരണം ഒരു കാരണവശാലും തടസ്സപ്പെടരുതെന്ന് കോടതി വ്യക്തമാക്കി.

നിലവിലെ പഞ്ചാബ് സർക്കാരിനെതിരെ വാർത്ത പ്രസിദ്ധീകരിച്ചതിലുള്ള പ്രതികാര നടപടിയായാണ് പ്രസ്സുകളിലേക്കുള്ള വൈദ്യുതി വിച്ഛേദിക്കുന്നതെന്ന് പത്രഗ്രൂപ്പിന് വേണ്ടി ഹാജരായ മുതിർന്ന അഭിഭാഷകൻ മുകുൾ റോത്തഗി വാദിച്ചു. പത്രത്തിന്റെ ഉടമസ്ഥതയിലുള്ള ഹോട്ടലുകൾ അടച്ചുപൂട്ടിയെന്നും അവർക്കെതിരെ എഫ്‌ഐആർ രജിസ്റ്റർ ചെയ്തതായും അദ്ദേഹം കോടതിയെ അറിയിച്ചു. ഈ വിഷയത്തിൽ പഞ്ചാബ്-ഹരിയാന ഹൈക്കോടതി വിധി പറയാൻ മാറ്റിയിരിക്കുകയാണെന്നും എന്നാൽ ഇടക്കാല ആശ്വാസം നൽകിയിട്ടില്ലെന്നും അഭിഭാഷകൻ ചൂണ്ടിക്കാട്ടി. ഒരു ലേഖനത്തിന്റെ പേരിൽ ഒരു പത്രം നിശബ്ദമാക്കപ്പെടരുതെന്ന് അദ്ദേഹം കോടതിയിൽ വാദിച്ചു.

പത്രത്തിന്റെ വാദങ്ങൾ ഗൗരവമായി എടുത്ത സുപ്രീം കോടതി, മലിനീകരണ നിയന്ത്രണ ബോർഡിന്റെ നടപടികളിൽ തൽസ്ഥിതി തുടരാൻ ഉത്തരവിട്ടു. പ്രിന്റിംഗ് പ്രസ്സുകൾക്ക് പുറമെ ഉടമകളുടെ മറ്റ് സ്വത്തുക്കളുടെ കാര്യത്തിലും തൽസ്ഥിതി നിലനിർത്തണം. പഞ്ചാബ് സർക്കാരിന്റെ അഭിഭാഷകൻ മലിനീകരണ ലംഘനങ്ങളെക്കുറിച്ച് വാദിച്ചെങ്കിലും, പത്രപ്രവർത്തനത്തിന്റെ സ്വതന്ത്രമായ പ്രവർത്തനം ഉറപ്പാക്കാൻ കോടതി മുൻഗണന നൽകി. ഹൈക്കോടതി വിധി വന്നാലും അതിനുശേഷം ഒരാഴ്ച കൂടി സുപ്രീം കോടതിയുടെ ഈ സംരക്ഷണം തുടരുമെന്നും ഉത്തരവിൽ പറയുന്നു.