ന്യൂഡൽഹി: പി എം ശ്രീ പദ്ധതിയെക്കുറിച്ച് കോൺഗ്രസ് നേതാവ് പ്രിയങ്ക ഗാന്ധി നടത്തിയ പരാമർശങ്ങൾക്കെതിരെ രൂക്ഷവിമർശനവുമായി കേന്ദ്ര വിദ്യാഭ്യാസമന്ത്രി ധർമ്മേന്ദ്ര പ്രധാൻ രംഗത്തുവന്നു. പ്രിയങ്കയുടെ പ്രസ്താവനകൾ അജ്ഞതയുടെയും രാഷ്ട്രീയ അവസരവാദത്തിന്റെയും പ്രകടനമാണെന്ന് അദ്ദേഹം കുറ്റപ്പെടുത്തി.(Priyanka's criticism of PM SHRI is ignorance and political opportunism, says Dharmendra Pradhan)
നിരുത്തരവാദപരവും തെറ്റിദ്ധരിപ്പിക്കുന്നതുമായ പ്രസ്താവനകളിലൂടെ പ്രിയങ്ക ഗാന്ധി വസ്തുതകളെ വളച്ചൊടിക്കുകയാണെന്ന് ധർമ്മേന്ദ്ര പ്രധാൻ ചൂണ്ടിക്കാട്ടി. ഇത് രാജ്യത്തെ വിദ്യാഭ്യാസ വിദഗ്ധരോടുള്ള അനാദരവാണെന്നും അദ്ദേഹം കൂട്ടിച്ചേർത്തു.
പഴയ രാഷ്ട്രീയ രാജവംശങ്ങളുടെ അംഗീകാരം ആവശ്യമില്ലാത്ത ഒരു ഇന്ത്യ എന്ന ആശയത്തെയാണ് പ്രിയങ്ക എതിർക്കുന്നത്. പതിറ്റാണ്ടുകളായി വിദ്യാഭ്യാസം രാഷ്ട്രീയ വാചാടോപവും അവഗണനയുമായി ചുരുങ്ങിയതിലുള്ള അസ്വസ്ഥതയാണ് പ്രിയങ്കയുടെ വാക്കുകളിൽ പ്രകടമാകുന്നത്.
കുട്ടികളെ ശാക്തീകരിക്കുന്നത് പ്രത്യയശാസ്ത്രപരമാണെങ്കിൽ, രാഷ്ട്രനിർമ്മാണമാണ് ആ പ്രത്യയശാസ്ത്രം എന്നും ധർമ്മേന്ദ്ര പ്രധാൻ വ്യക്തമാക്കി.
കേന്ദ്രമന്ത്രിയുടെ വിമർശനത്തിന് ആധാരമായ പ്രസ്താവന പ്രിയങ്ക ഗാന്ധി നടത്തിയത് കേരള സർക്കാരിനെതിരെയായിരുന്നു. വയനാട് എം.പി. കൂടിയായ പ്രിയങ്ക, പി.എം. ശ്രീ പദ്ധതി സംബന്ധിച്ച് കേരള സർക്കാരിന് ഇപ്പോഴും വ്യക്തതയില്ലെന്ന് കുറ്റപ്പെടുത്തി. ഇത്തരത്തിലുള്ള വിഷയങ്ങളിൽ 'രണ്ട് വള്ളത്തിൽ കാലുവെയ്ക്കരുത്' എന്നും, സ്വന്തമായി നിലപാടെടുക്കാൻ സർക്കാരിന് കഴിയണമെന്നും പ്രിയങ്കാ ഗാന്ധി പറഞ്ഞിരുന്നു.