മുംബൈ: ബാഫ്റ്റ പുരസ്കാരം നേടി ചരിത്രം കുറിച്ച മണിപ്പൂരി ചിത്രം ‘ബൂംഗി’നെ (Boong) അഭിനന്ദിച്ച് പ്രിയങ്ക ചോപ്ര. ഇത്തരം കഥകൾ കാണപ്പെടേണ്ടതും ഓർത്തിരിക്കേണ്ടതുമാണെന്ന് പ്രിയങ്ക ഇൻസ്റ്റാഗ്രാമിൽ കുറിച്ചു. ലക്ഷ്മിപ്രിയ ദേവിയുടെയും സംഘത്തിന്റെയും കഠിനാധ്വാനത്തെ താരം പ്രശംസിച്ചു.
ഇന്ത്യൻ സിനിമയ്ക്ക് തന്നെ അഭിമാനമായ ഈ നേട്ടത്തെ ആലിയ ഭട്ട്, കരീന കപൂർ ഖാൻ തുടങ്ങിയവരും അഭിനന്ദിച്ചു. ഒരു മണിപ്പൂരി ചിത്രം ഇത്തരത്തിൽ ആഗോളതലത്തിൽ ശ്രദ്ധിക്കപ്പെടുന്നത് ഇന്ത്യൻ സിനിമയുടെ വളർച്ചയെയാണ് കാണിക്കുന്നതെന്ന് ആലിയ ഭട്ട് അഭിപ്രായപ്പെട്ടു. ഇതിഹാസ തുല്യമായ നേട്ടം എന്നാണ് ആലിയ ഇതിനെ വിശേഷിപ്പിച്ചത്. മണിപ്പൂരിലെ ഒരു കൊച്ചുബാലൻ തന്റെ അച്ഛനെ തേടി നടത്തുന്ന വൈകാരികമായ യാത്രയാണ് ചിത്രം പറയുന്നത്. ഈ വിജയത്തിലൂടെ ഇന്ത്യൻ സിനിമയുടെ ഭാവി സ്ത്രീകളുടേതാണെന്ന് തെളിയിക്കപ്പെട്ടതായി നിർമ്മാതാവ് ഗുനീത് മോംഗയും വ്യക്തമാക്കി.
