കൊൽക്കത്ത: പശ്ചിമ ബംഗാളിലെ സംസ്ഥാന സർവകലാശാലകളുടെ ചാൻസലറായി മുഖ്യമന്ത്രിയെ നിയമിക്കാനുള്ള സംസ്ഥാന സർക്കാരിന്റെ നീക്കത്തിന് തിരിച്ചടി. ഇതുമായി ബന്ധപ്പെട്ട് നിയമസഭ പാസാക്കിയ മൂന്ന് സുപ്രധാന ഭേദഗതി ബില്ലുകൾക്ക് രാഷ്ട്രപതി ദ്രൗപദി മുർമു അംഗീകാരം നിഷേധിച്ചു. ഇതോടെ ഗവർണർ തന്നെ സർവകലാശാലകളുടെ ചാൻസലറായി തുടരും.
2022 ജൂണിൽ പശ്ചിമ ബംഗാൾ നിയമസഭ പാസാക്കിയ താഴെ പറയുന്ന ബില്ലുകളാണ് രാഷ്ട്രപതി തള്ളിയത്:
പശ്ചിമ ബംഗാൾ സർവകലാശാല നിയമങ്ങൾ (ഭേദഗതി) ബിൽ, 2022
ആലിയ സർവകലാശാല (ഭേദഗതി) ബിൽ, 2022
പശ്ചിമ ബംഗാൾ ആരോഗ്യ ശാസ്ത്ര സർവകലാശാല (ഭേദഗതി) ബിൽ, 2022
2024 ഏപ്രിലിൽ പശ്ചിമ ബംഗാൾ ഗവർണർ ഡോ. സി.വി. ആനന്ദബോസ് ഈ ബില്ലുകൾ രാഷ്ട്രപതിയുടെ പരിഗണനയ്ക്കായി അയച്ചിരുന്നു. കേന്ദ്രതലത്തിൽ നടന്ന വിശദമായ പരിശോധനകൾക്ക് ശേഷമാണ് രാഷ്ട്രപതി ഈ തീരുമാനമെടുത്തതെന്ന് രാജ്ഭവൻ വക്താവ് അറിയിച്ചു.
മുഖ്യമന്ത്രിയെ ചാൻസലറാക്കുന്നതിലൂടെ ഭരണപരമായ തീരുമാനങ്ങൾ വേഗത്തിലാക്കാമെന്നായിരുന്നു മമത ബാനർജി സർക്കാരിന്റെ വാദം. എന്നാൽ, സർവകലാശാലകളുടെ സ്വയംഭരണാധികാരത്തെയും ഗവർണറുടെ അധികാരത്തെയും ബാധിക്കുന്നതാണ് ഈ നീക്കമെന്ന വിമർശനം ഉയർന്നിരുന്നു. രാഷ്ട്രപതിയുടെ തീരുമാനത്തോടെ നിലവിലെ നിയമം മാറ്റമില്ലാതെ തുടരും.