മഹാരാഷ്ട്ര: നാസിക്കിലെ കറൻസി നോട്ട് പ്രസ്സിൽ വ്യാജ രേഖകൾ ചമച്ച് ജോലി നേടിയവർക്കെതിരെ പോലീസ് കേസെടുത്തു(currency). 7 പേർക്കെതിരെയാണ് പോലീസ് കേസ് രജിസ്റ്റർ ചെയ്തിട്ടുള്ളത്. പ്രതികൾ നിയമന പരീക്ഷ എഴുതാൻ പ്രോക്സി ഉദ്യോഗാർത്ഥികളെ ഏർപ്പാട് ചെയ്തതായും തൊഴിൽ ഉറപ്പാക്കാൻ വ്യാജ ഐ.ടി.ഐ, ഡിപ്ലോമ സർട്ടിഫിക്കറ്റുകൾ സമർപ്പിച്ചതായും അന്വേഷണത്തിൽ കണ്ടെത്തി. ജൂനിയർ ടെക്നീഷ്യൻ (പ്രിന്റ്), ജൂനിയർ ടെക്നീഷ്യൻ (ഇലക്ട്രിക്കൽ), സൂപ്പർവൈസർമാർ എന്നീ തസ്തികകളിലേക്കാണ് പ്രതികൾ വ്യാജ രേഖ ചമച്ചത്.
ഇവർക്കെതിരെ ഇന്ത്യൻ ശിക്ഷാ നിയമം സെക്ഷൻ 120(ബി) (ക്രിമിനൽ ഗൂഢാലോചന), 420 (വഞ്ചന), 465 (വ്യാജരേഖ ചമയ്ക്കൽ), 467 (വിലപ്പെട്ട സെക്യൂരിറ്റി വ്യാജരേഖ ചമയ്ക്കൽ, വിൽപത്രം മുതലായവ), 468 (വഞ്ചിക്കുന്നതിനായി വ്യാജരേഖ ചമയ്ക്കൽ), 471 (വ്യാജ രേഖ യഥാർത്ഥമായി ഉപയോഗിക്കൽ) എന്നീ വകുപ്പുകൾ പ്രകാരമാണ് കേസ് രജിസ്റ്റർ ചെയ്തിരിക്കുന്നത്. പൊവായ് പോലീസിനാണ് കേസിന്റെ അന്വേഷണ ചുമതല.