മുംബൈ: മഹാരാഷ്ട്രയിലെ ഛത്രപതി സംഭാജിനഗറിൽ നടന്ന ഗവൺമെന്റ് റെയിൽവേ പോലീസ് റിക്രൂട്ട്മെന്റ് റാലിക്കിടെ 24 വയസ്സുകാരനായ ഉദ്യോഗാർത്ഥി കുഴഞ്ഞുവീണു മരിച്ചു (Police Recruitment Aspirant Death). സാംഗ്ലി ജില്ലയിലെ പാലൂസ് സ്വദേശിയായ സംഗ്രാം ഷിൻഡെയാണ് മരിച്ചത്. ശനിയാഴ്ച രാവിലെ നടന്ന 1600 മീറ്റർ ഓട്ടമത്സരത്തിനിടെയായിരുന്നു ഈ ദാരുണ സംഭവം.
പോലീസ് പരേഡ് ഗ്രൗണ്ടിൽ നടന്ന ഓട്ടമത്സരത്തിൽ ഫിനിഷിംഗ് ലൈനിന് തൊട്ടടുത്തെത്തിയപ്പോഴാണ് സംഗ്രാം കുഴഞ്ഞുവീണത്. ഉടൻ തന്നെ സമീപത്തെ ആശുപത്രിയിൽ എത്തിച്ചെങ്കിലും ചികിത്സയ്ക്കിടെ മരണം സംഭവിക്കുകയായിരുന്നു. 93 പോലീസ് കോൺസ്റ്റബിൾ തസ്തികകളിലേക്കുള്ള റിക്രൂട്ട്മെന്റ് ഡ്രൈവ് വെള്ളിയാഴ്ചയാണ് ആരംഭിച്ചത്. സംഗ്രാമിനൊപ്പം ഏകദേശം അറുന്നൂറിലധികം ഉദ്യോഗാർത്ഥികളാണ് ശനിയാഴ്ച നടന്ന ശാരീരികക്ഷമതാ പരീക്ഷയിൽ പങ്കെടുത്തത്.
കഠിനമായ വ്യായാമത്തിനിടയിലുണ്ടായ ആരോഗ്യപ്രശ്നങ്ങളാണോ മരണകാരണമെന്ന് പോലീസ് പരിശോധിച്ചുവരികയാണ്. സംഭവത്തിൽ പോലീസ് വിശദമായ അന്വേഷണം ആരംഭിച്ചിട്ടുണ്ട്. പോസ്റ്റ്മോർട്ടം റിപ്പോർട്ട് ലഭിച്ചാലേ മരണത്തിന്റെ കൃത്യമായ കാരണം വ്യക്തമാകൂ എന്ന് അധികൃതർ അറിയിച്ചു.
Summary: A 24-year-old police job aspirant, Sangram Shinde, died after collapsing during a 1600-meter running test in Chhatrapati Sambhajinagar.
