ന്യൂഡൽഹി: 'വന്ദേ മാതര'ത്തിന്റെ 150-ാം വാർഷികാഘോഷത്തിന്റെ ഭാഗമായി ഇന്ന് ലോക്സഭയിൽ പ്രത്യേക ചർച്ച നടക്കും. ഇന്ന് രാവിലെ 10 മണിക്ക് ആരംഭിക്കുന്ന, 10 മണിക്കൂർ നീണ്ടുനിൽക്കുന്ന ഈ സുപ്രധാന ചർച്ചയ്ക്ക് പ്രധാനമന്ത്രി നരേന്ദ്ര മോദി തുടക്കം കുറിക്കും.(PM Modi to kick off 10-hour debate in Lok Sabha)
ചൊവ്വാഴ്ച ലോക്സഭയിൽ വോട്ടർ പട്ടിക പരിഷ്കരണത്തെക്കുറിച്ച് ചർച്ച നടക്കും. ഈ തിരഞ്ഞെടുപ്പ് പരിഷ്കരണ ചർച്ചയിൽ പ്രധാനമന്ത്രി പങ്കെടുക്കാത്തത് പ്രതിപക്ഷം സഭയിൽ ആയുധമാക്കാൻ സാധ്യതയുണ്ട്. ഇരു ചർച്ചകളിലും പൂർണ്ണമായി സഹകരിക്കുമെന്ന് പ്രതിപക്ഷം നേരത്തെ അറിയിച്ചിട്ടുണ്ട്.
വിവാദ വിഷയങ്ങൾ സഭയിൽ ഉന്നയിക്കാനും പ്രതിപക്ഷം ഒരുങ്ങുന്നുണ്ട്. ഇൻഡിഗോ വിമാന സർവീസുകളിലെ തുടർച്ചയായ പ്രതിസന്ധിയും യാത്രാക്ലേശവും പ്രതിപക്ഷം സഭയിൽ ഉന്നയിക്കും. കൊട്ടിയത്ത് ദേശീയപാത തകർന്നതുൾപ്പെടെയുള്ള അടിസ്ഥാന സൗകര്യ പ്രശ്നങ്ങളും പ്രതിപക്ഷം ചർച്ചയ്ക്ക് കൊണ്ടുവരും. ചരിത്രപരമായ ചർച്ച നടക്കുന്ന ദിവസം ലോക്സഭ നടപടികൾ ശ്രദ്ധേയമാകും.