ചെന്നൈ: തമിഴ്‌നാട്ടിലെ കരൂരിൽ തമിഴക വെട്രി കഴകം (ടിവികെ) തലവനും നടനുമായ വിജയ് അഭിസംബോധന ചെയ്‌ത രാഷ്ട്രീയ റാലിയിൽ തിക്കിലും തിരക്കിലും പെട്ട് മരിച്ചവരുടെ അടുത്ത ബന്ധുക്കൾക്ക് പ്രധാനമന്ത്രി നരേന്ദ്ര മോദിയും ധനസഹായം പ്രഖ്യാപിച്ചു. പ്രധാനമന്ത്രിയുടെ ദേശീയ ദുരിതാശ്വാസ നിധിയിൽ നിന്ന് (പിഎംഎൻആർഎഫ്) രണ്ട് ലക്ഷം രൂപ വീതം നൽകുമെന്ന് പ്രധാനമന്ത്രി നരേന്ദ്ര മോദി അറിയിച്ചു. അപകടത്തിൽ പരിക്കേറ്റവർക്ക് 50,000 രൂപ നൽകും.PM Modi on Karur Stampede)
വിജയ് തങ്ങളുടെ പ്രിയപ്പെട്ടവരെ നഷ്ടപ്പെട്ട കുടുംബങ്ങൾക്ക് 20 ലക്ഷം രൂപ നഷ്ടപരിഹാരം പ്രഖ്യാപിച്ചിരുന്നു. തമിഴ്നാട് മുഖ്യമന്ത്രി എം.കെ. സ്റ്റാലിൻ മരിച്ചവരുടെ കുടുംബങ്ങൾക്ക് 10 ലക്ഷം രൂപയും പരിക്കേറ്റവർക്ക് ഒരു ലക്ഷം രൂപയും ധനസഹായം നൽകുമെന്ന് അറിയിച്ചു.
സമഗ്രമായ അന്വേഷണം നടത്തി സംസ്ഥാന സർക്കാരിന് റിപ്പോർട്ട് നൽകാൻ വിരമിച്ച ഹൈക്കോടതി ജഡ്ജി ജസ്റ്റിസ് അരുണ ജഗദീശൻ്റെ നേതൃത്വത്തിൽ ഏകാംഗ അന്വേഷണ കമ്മിഷൻ രൂപീകരിക്കാനും സ്റ്റാലിൻ ഉത്തരവിട്ടു. അപകടത്തിൽപ്പെട്ട് മരിച്ചവരുടെ എണ്ണം 39 ആയി ഉയർന്നു. 67 പേർ ഇപ്പോഴും കിടപ്പുരോഗികളായി ചികിത്സയിലാണെന്ന് തമിഴ്നാട് ആരോഗ്യ സെക്രട്ടറി പി സെന്തിൽ കുമാർ ഞായറാഴ്ച പറഞ്ഞു.
കരൂരിൽ തിക്കിലും തിരക്കിലും പെട്ട് മരിച്ചവരുടെ കുടുംബങ്ങൾക്ക് 20 ലക്ഷം രൂപ വീതം നൽകുമെന്ന് നടനും രാഷ്ട്രീയ നേതാവുമായ വിജയ് ഞായറാഴ്ച പ്രഖ്യാപിച്ചു. ഇത് ഒരിക്കലും നികത്താനാവാത്ത നഷ്ടമാണെന്നും അദ്ദേഹം പറഞ്ഞു. "ആരു സാന്ത്വനം പറഞ്ഞാലും നമ്മുടെ പ്രിയപ്പെട്ടവരുടെ വേർപാട് താങ്ങാനാവില്ല. എന്നിട്ടും നിങ്ങളുടെ കുടുംബാംഗം എന്ന നിലയിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് 20 ലക്ഷം രൂപ വീതവും പരിക്കേറ്റ് ചികിത്സയിൽ കഴിയുന്നവർക്ക് 2 ലക്ഷം രൂപ വീതവും നൽകാൻ ഞാൻ ഉദ്ദേശിക്കുന്നു. ചികിത്സയിൽ കഴിയുന്നവർക്ക് തമിഴക വെട്രി കഴകം എല്ലാ പിന്തുണയും നൽകുമെന്ന് അദ്ദേഹം ഉറപ്പ് നൽകി.
തിക്കിലും തിരക്കിലും പെട്ട് എട്ട് കുട്ടികളടക്കം 39 പേർ മരിച്ചു. ഇരകളിൽ 16 സ്ത്രീകളും ഉൾപ്പെടുന്നു, സ്ഥിതിഗതികൾ അവലോകനം ചെയ്യാൻ സെക്രട്ടേറിയറ്റിൽ സംസ്ഥാന ഉന്നത ഉദ്യോഗസ്ഥരുടെ യോഗം വിളിച്ച സംസ്ഥാന മുഖ്യമന്ത്രി സ്റ്റാലിൻ പറഞ്ഞു. സംഭവത്തെ കുറിച്ച് അന്വേഷിക്കാൻ ജസ്റ്റിസ് അരുണ ജഗദീശൻ്റെ നേതൃത്വത്തിൽ അന്വേഷണ കമ്മീഷനെയും അദ്ദേഹം പ്രഖ്യാപിച്ചു. പ്രസിഡൻ്റ് ദ്രൗപതി മുർമു, പ്രധാനമന്ത്രി നരേന്ദ്ര മോദി, കോൺഗ്രസ് നേതാവ് രാഹുൽ ഗാന്ധി തുടങ്ങിയവരും ദാരുണമായ സംഭവത്തിൽ അനുശോചനം രേഖപ്പെടുത്തി.
അതിനിടെ, ദുരന്തത്തിൽ കേന്ദ്ര ആഭ്യന്തര മന്ത്രാലയം തമിഴ്നാട് സർക്കാരിനോട് റിപ്പോർട്ട് തേടി. കരൂരിൽ തിക്കിലും തിരക്കിലും പെട്ട് സ്ഥിതിഗതികൾ വിലയിരുത്താൻ കേന്ദ്ര ആഭ്യന്തര മന്ത്രി അമിത് ഷാ തമിഴ്നാട് ഗവർണർ ആർ എൻ രവിയുമായും സ്റ്റാലിനുമായും സംസാരിക്കുകയും സാധ്യമായ എല്ലാ കേന്ദ്ര സഹായവും ഉറപ്പുനൽകുകയും ചെയ്തു. സ്റ്റാലിൻ സർക്കാർ മരണപ്പെട്ടവരുടെ കുടുംബങ്ങൾക്ക് 10ലക്ഷം രൂപ വീതം നഷ്ടപരിഹാരം പ്രഖ്യാപിച്ചിരുന്നു. ടിവികെ അധ്യക്ഷൻ വിജയ് സംസ്ഥാന പര്യടനം നിര്‍ത്തിവെച്ചു. അദ്ദേഹത്തെ തിടുക്കത്തിൽ അറസ്റ്റ് ചെയ്യേണ്ട എന്നാണ് സർക്കാർ നിലപാട്. ദുരന്തത്തിൽ സ്വതന്ത്ര അന്വേഷണം ആവശ്യപ്പെട്ട് മദ്രാസ് ഹൈക്കോടതിയെ സമീപിക്കാൻ ടി വി കെ തീരുമാനമെടുത്തു. നിയമോപദേശം തേടും.വിജയ് നിർത്തി വച്ചിരിക്കുന്നത് അടുത്ത മാസം കോയമ്പത്തൂര്‍, നീലഗിരി ജില്ലകളിൽ നടത്താനിരുന്ന പര്യടനമാണ്.