ന്യൂഡൽഹി: പശ്ചിമേഷ്യയിൽ അതീവ ഗുരുതരമായി തുടരുന്ന സൈനിക സംഘർഷത്തിന്റെ പശ്ചാത്തലത്തിൽ, സുരക്ഷാ കാര്യങ്ങൾക്കായുള്ള കാബിനറ്റ് കമ്മിറ്റിയുടെ (PM Modi CCS Meeting) പ്രത്യേക യോഗം പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്നു. യുദ്ധം ഇന്ത്യയുടെ ആഭ്യന്തര സുരക്ഷയെയും സാമ്പത്തിക മേഖലയെയും എപ്രകാരം ബാധിക്കുമെന്ന് യോഗം വിശദമായി വിലയിരുത്തി. പശ്ചിമേഷ്യൻ പ്രതിസന്ധി ആരംഭിച്ച ശേഷം പ്രധാനമന്ത്രി വിളിച്ചുചേർക്കുന്ന രണ്ടാമത്തെ അടിയന്തര സുരക്ഷാ യോഗമാണിത്.
വിദേശകാര്യം, പ്രതിരോധം, പെട്രോളിയം, വാണിജ്യം എന്നീ മന്ത്രാലയങ്ങൾ ഇതുവരെ സ്വീകരിച്ച നടപടികൾ പ്രധാനമന്ത്രി വിലയിരുത്തി. ഇന്ധനവില വർദ്ധനവ് ഉൾപ്പെടെയുള്ള സാമ്പത്തിക ആഘാതങ്ങൾ നേരിടാനുള്ള കർശന നടപടികളെക്കുറിച്ച് യോഗം ചർച്ച ചെയ്തു. യുദ്ധമേഖലയിൽ കഴിയുന്ന ഇന്ത്യൻ പൗരന്മാരുടെ സുരക്ഷയ്ക്കാണ് പ്രഥമ പരിഗണന. സാഹചര്യങ്ങൾ മോശമാവുകയാണെങ്കിൽ ഇവരെ അടിയന്തരമായി നാട്ടിലെത്തിക്കുന്നതിനുള്ള ഒഴിപ്പിക്കൽ പദ്ധതികൾക്ക് (Evacuation Plans) യോഗം രൂപം നൽകി.മേഖലയിൽ സമാധാനം പുനഃസ്ഥാപിക്കുന്നതിനായി ഇന്ത്യ നടത്തേണ്ട നയതന്ത്ര ഇടപെടലുകളെക്കുറിച്ചും വിദേശകാര്യ മന്ത്രാലയം വിശദീകരിച്ചു.
പ്രതിരോധ മന്ത്രി രാജ്നാഥ് സിംഗ്, ആഭ്യന്തര മന്ത്രി അമിത് ഷാ, വിദേശകാര്യ മന്ത്രി എസ്. ജയശങ്കർ, ധനമന്ത്രി നിർമല സീതാരാമൻ എന്നിവരും ദേശീയ സുരക്ഷാ ഉപദേഷ്ടാവ് അജിത് ഡോവലും യോഗത്തിൽ സംബന്ധിച്ചു. പശ്ചിമേഷ്യയിലെ ഓരോ ചലനങ്ങളും അതീവ ജാഗ്രതയോടെ നിരീക്ഷിക്കാൻ പ്രധാനമന്ത്രി ബന്ധപ്പെട്ട വകുപ്പുകൾക്ക് നിർദ്ദേശം നൽകി.
Story Summary:
Prime Minister Narendra Modi chaired a high-level meeting of the Cabinet Committee on Security (CCS) to assess the impact of the ongoing Middle East conflict on India’s security and economy. This is the second such meeting since the crisis began. The discussions focused on safeguarding Indian citizens in war zones, preparing for potential evacuations, and mitigating economic risks. Top ministers and NSA Ajit Doval attended the session to review precautionary measures.
