ന്യൂഡൽഹി : ഇന്ത്യയുമായി യുക്തിപൂർവമായ ഒരു വ്യാപാര ഇടപാടിന് തയ്യാറെടുക്കുകയാണെന്നും, ഇന്ത്യയുടെ ഇറക്കുമതിത്തീരുവ കുറയ്ക്കാൻ പദ്ധതിയുണ്ടെന്നും യു.എസ്. പ്രസിഡന്റ് ഡൊണാൾഡ് ട്രംപ് വ്യക്തമാക്കി. റഷ്യയുമായുള്ള എണ്ണ വ്യാപാരം കാരണമാണ് ഇന്ത്യ ഉയർന്ന തീരുവ നേരിടുന്നതെന്നും എന്നാൽ ഇന്ത്യ റഷ്യൻ എണ്ണ വാങ്ങുന്നത് നിർത്തിയതായും ട്രംപ് ആവർത്തിച്ചു അവകാശപ്പെട്ടു. വൈറ്റ് ഹൗസിൽ മാധ്യമപ്രവർത്തകരോട് പ്രതികരിക്കുകയായിരുന്നു അദ്ദേഹം.(Plans to reduce tariffs on India, says Trump)
"റഷ്യൻ എണ്ണ കാരണമാണ് ഇന്ത്യയുടെ മേൽ ഉയർന്ന തീരുവ ചുമത്തിയത്. ഇന്ത്യ റഷ്യൻ എണ്ണ വാങ്ങുന്നത് ഗണ്യമായി നിർത്തിയിരിക്കുന്നു," ഇന്ത്യയുമായുള്ള വ്യാപാര ചർച്ചകളെക്കുറിച്ച് ചോദിച്ചപ്പോൾ ട്രംപ് പറഞ്ഞു. "ഞങ്ങൾ തീരുവ കുറയ്ക്കാൻ പോവുകയാണ്. ഒരു ഘട്ടത്തിൽ ഞങ്ങൾ അത് കുറയ്ക്കും," ട്രംപ് കൂട്ടിച്ചേർത്തു.
റഷ്യയുമായുള്ള ന്യൂഡൽഹിയുടെ ഊർജ്ജ ഇടപാടുകൾ ചൂണ്ടിക്കാട്ടി ഓഗസ്റ്റിൽ യു.എസ്. ഇന്ത്യൻ ഉൽപ്പന്നങ്ങളുടെ ഇറക്കുമതിത്തീരുവ വർദ്ധിപ്പിച്ച് മാസങ്ങൾക്ക് ശേഷമാണ് ട്രംപിന്റെ ഏറ്റവും പുതിയ പരാമർശങ്ങൾ വരുന്നത്. യുക്രൈൻ അധിനിവേശവും യുദ്ധവും അവസാനിപ്പിക്കാൻ റഷ്യൻ പ്രസിഡന്റ് വ്‌ളാഡിമിർ പുടിനെ പ്രേരിപ്പിക്കുന്നതിനുള്ള ഒരു സമ്മർദ്ദ തന്ത്രമായാണ് യു.എസിന്റെ ഈ തീരുവ വർധനവ് നേരത്തെ വിലയിരുത്തപ്പെട്ടിരുന്നത്.