പത്താൻകോട്ട്: അതിർത്തി കടന്നുള്ള ചാരപ്രവർത്തനങ്ങൾക്കായി പാക് ഏജൻസികൾ ഇന്ത്യൻ കുട്ടികളെ ഉപയോഗിക്കുന്നതായി റിപ്പോർട്ട്. ജമ്മു കശ്മീരിലെ സാംബ ജില്ലയിൽ നിന്നുള്ള 15 വയസ്സുകാരനെ പഞ്ചാബ് പോലീസ് അറസ്റ്റ് ചെയ്തതോടെയാണ് ഈ പുതിയ തന്ത്രം വെളിപ്പെട്ടത്. ഏകദേശം നാൽപ്പതോളം പ്രായപൂർത്തിയാകാത്ത കുട്ടികൾ ഇപ്പോൾ സുരക്ഷാസേനയുടെ നിരീക്ഷണത്തിലാണ്.(Pakistan traps teenagers for espionage, 40 children under surveillance)
പഞ്ചാബിൽ നിന്നും ഹരിയാനയിൽ നിന്നുമായി 12 കുട്ടികളും, ജമ്മു കശ്മീരിൽ നിന്ന് 25 കുട്ടികളും ഐഎസ്ഐയുടെ സ്വാധീനവലയത്തിലാണെന്ന് മുതിർന്ന ഉദ്യോഗസ്ഥർ വെളിപ്പെടുത്തി. ഇന്ത്യൻ സൈന്യത്തിന്റെ തന്ത്രപ്രധാനമായ സ്ഥലങ്ങൾ, വാഹനങ്ങളുടെ നീക്കം എന്നിവ ചിത്രീകരിച്ച് പാകിസ്താനിലെ ഹാൻഡ്ലർമാർക്ക് അയച്ചുനൽകുകയായിരുന്നു ഇവരുടെ പ്രധാന ജോലി.
സോഷ്യൽ മീഡിയയിലെ ചാറ്റ് റൂമുകൾ വഴിയും സംശയാസ്പദമായ ആപ്പുകൾ വഴിയുമാണ് ഐഎസ്ഐ കുട്ടികളെ കെണിയിൽ വീഴ്ത്തുന്നത്. പത്താൻകോട്ട് എസ്എസ്പി ദൽജിന്ദർ സിങ് ധില്ലന്റെ നേതൃത്വത്തിൽ നടന്ന പരിശോധനയിൽ നിർണ്ണായക തെളിവുകൾ ലഭിച്ചു.
പിടിയിലായ കുട്ടിയുടെ ഫോൺ പാക് ഏജൻസികൾ ക്ലോൺ ചെയ്തിരുന്നു. ഇത് കുട്ടിയുടെ പ്രവർത്തനങ്ങൾ തത്സമയം നിരീക്ഷിക്കാനും വിവരങ്ങൾ നേരിട്ട് ചോർത്താനും അവരെ സഹായിച്ചു. സാമ്പത്തികമായ ബുദ്ധിമുട്ടുകൾ അനുഭവിക്കുന്നവരെയോ മാനസികമായ വെല്ലുവിളികൾ നേരിടുന്നവരെയോ ആണ് പാക് ഏജൻസികൾ പ്രധാനമായും ലക്ഷ്യം വയ്ക്കുന്നത്.
സംഭവം പുറത്തായതോടെ പഞ്ചാബിലും പരിസര സംസ്ഥാനങ്ങളിലും അതീവ ജാഗ്രതാ നിർദ്ദേശം നൽകിയിട്ടുണ്ട്. അതിർത്തി ഗ്രാമങ്ങളിലെ കുട്ടികളുടെ ഓൺലൈൻ പ്രവർത്തനങ്ങളിൽ രക്ഷിതാക്കൾ പ്രത്യേക ശ്രദ്ധ പുലർത്തണമെന്ന് പോലീസ് ആവശ്യപ്പെട്ടു. കുട്ടികളെ ഉപയോഗിച്ച് സൈനിക രഹസ്യങ്ങൾ ചോർത്തുന്നത് ദേശീയ സുരക്ഷയ്ക്ക് വലിയ വെല്ലുവിളിയാണെന്ന് ഉദ്യോഗസ്ഥർ വിലയിരുത്തുന്നു.