ദില്ലി: പ്രമുഖ സ്മാർട്ട്ഫോൺ ബ്രാൻഡായ വൺപ്ലസ് ഇന്ത്യയിലെ പ്രവർത്തനങ്ങൾ നിർത്തലാക്കുന്നുവെന്ന രീതിയിൽ പ്രചരിക്കുന്ന വാർത്തകൾ നിഷേധിച്ച് കമ്പനി ഇന്ത്യ സിഇഒ റോബിൻ ലിയു (OnePlus India Shutdown News). വൺപ്ലസ് ഇന്ത്യ വിടുകയാണെന്നും മാതൃകമ്പനിയായ ഓപ്പോയുമായി (Oppo) പൂർണ്ണമായി ലയിച്ച് ഒരു സബ്-സീരീസ് മാത്രമായി മാറുമെന്നുമായിരുന്നു കഴിഞ്ഞ കുറച്ചു ദിവസങ്ങളായി പ്രചരിച്ചിരുന്ന റിപ്പോർട്ടുകൾ. എന്നാൽ ഇത്തരം വാർത്തകൾ പൂർണ്ണമായും തെറ്റാണെന്നും വൺപ്ലസ് ഇന്ത്യയിൽ സജീവമായി തുടരുമെന്നും റോബിൻ ലിയു എക്സ് പ്ലാറ്റ്ഫോമിലൂടെ വ്യക്തമാക്കി.
ആൻഡ്രോയിഡ് ഹെഡ്ലൈൻസ് എന്ന പ്രമുഖ ടെക് മാധ്യമം പുറത്തുവിട്ട റിപ്പോർട്ടാണ് ഈ ഊഹാപോഹങ്ങൾക്ക് തുടക്കമിട്ടത്. വൺപ്ലസിന്റെ വരാനിരിക്കുന്ന പല പ്രോജക്റ്റുകളും ഇന്ത്യയിൽ നിർത്തിവെച്ചതായും ദക്ഷിണേന്ത്യയിലെ റീട്ടെയിലർമാരുമായി മാർജിൻ സംബന്ധിച്ച തർക്കങ്ങൾ നിലനിൽക്കുന്നതായും റിപ്പോർട്ടിൽ പരാമർശിച്ചിരുന്നു. വൺപ്ലസിനെ ഒരു സ്വതന്ത്ര ബ്രാൻഡായി നിലനിർത്തുന്നതിന് പകരം ഓപ്പോയുടെ കീഴിലുള്ള ഒരു പ്രത്യേക വിഭാഗമാക്കാൻ നീക്കം നടക്കുന്നുണ്ടെന്നായിരുന്നു പ്രധാന അവകാശവാദം.
എന്നാൽ ഈ കിംവദന്തികൾ തള്ളിക്കളഞ്ഞ സിഇഒ, ഇന്ത്യയിലെ വൺപ്ലസിന്റെ പ്രവർത്തനങ്ങൾ സാധാരണ നിലയിലാണെന്നും ഉപഭോക്താക്കൾക്ക് മികച്ച സേവനം നൽകുന്നതിൽ കമ്പനി പ്രതിജ്ഞാബദ്ധമാണെന്നും അറിയിച്ചു. ഭാവിയിലേക്കുള്ള വലിയ തയ്യാറെടുപ്പുകൾ കമ്പനി നടത്തുന്നുണ്ടെന്നും അദ്ദേഹം സൂചിപ്പിച്ചു. വൺപ്ലസ് 16 സീരീസ് ഉൾപ്പെടെയുള്ള അത്യാധുനിക ഫ്ലാഗ്ഷിപ്പ് ഫോണുകളുടെ നിർമ്മാണ തിരക്കിലാണെന്നും, ഇതിൽ 9,000 mAh ബാറ്ററിയും പുതിയ ഡിസ്പ്ലേ സാങ്കേതികവിദ്യയും ഉണ്ടാകുമെന്നും റിപ്പോർട്ടുകൾ സൂചിപ്പിക്കുന്നു.
OnePlus India CEO Robin Liu has dismissed rumors suggesting that the smartphone giant is shutting down its Indian operations or merging entirely into Oppo as a sub-brand. Clarifying on X (formerly Twitter), Liu stated that the claims published by some tech media outlets are false and that OnePlus remains committed to its Indian customers. He emphasized that business continues as usual, with the company currently working on its upcoming flagship OnePlus 16 series, which is expected to feature a massive 9,000 mAh battery.