ഭുവനേശ്വർ: ഒഡീഷയിൽ കനത്ത ചൂടിനെ തുടർന്ന് കോഴിഫാമിലെ 5300-ഓളം കോഴികൾ കൂട്ടത്തോടെ ചത്തൊടുങ്ങി (Odisha poultry farm chickens die). വൈദ്യുതി വിച്ഛേദനത്തെ തുടർന്ന് ഫാമിലെ അത്യാധുനിക കൂളിങ് സംവിധാനം നിലച്ചതാണ് മിനിറ്റുകൾക്കുള്ളിൽ വലിയ ദുരന്തത്തിന് കാരണമായത്. ഒഡീഷയിലെ മാൽക്കൻഗിരി ജില്ലയിലെ ഒരു പ്രമുഖ കോഴിഫാമിലാണ് സംഭവം.
പ്രദേശത്ത് ഉഷ്ണതരംഗത്തിന് സമാനമായ രീതിയിൽ താപനില വളരെ ഉയർന്ന തോതിലായിരുന്നുവെന്ന് ഫാം ഉടമ പറഞ്ഞതായി എൻഡിടിവി (NDTV) റിപ്പോർട്ട് ചെയ്തു. കനത്ത ചൂടിൽ നിന്നും കോഴികളെ സംരക്ഷിക്കാൻ അടച്ചിട്ട വലിയ ഷെഡുകൾക്കുള്ളിൽ കൂളിംഗ് ഫാനുകളും വെന്റിലേഷൻ സംവിധാനങ്ങളും ഒരുക്കിയിരുന്നു. ഇതിനായി ഫാം പൂർണ്ണമായും വൈദ്യുതിയെയാണ് ആശ്രയിച്ചിരുന്നത്.
എന്നാൽ പ്രദേശത്ത് പെട്ടെന്ന് വൈദ്യുതി വിതരണം തടസ്സപ്പെടുകയായിരുന്നു. കനത്ത പുറംചൂടിനിടയിൽ വൈദ്യുതി കൂടി നിലച്ചതോടെ മിനിറ്റുകൾക്കുള്ളിൽ അടച്ചിട്ട ഷെഡുകൾക്കുള്ളിൽ മാരകമായ രീതിയിൽ ചൂട് വർദ്ധിക്കുകയും അതൊരു ‘ഹീറ്റ് ചേമ്പർ’ (Heat Chamber) ആയി മാറുകയും ചെയ്തു. കനത്ത ചൂടും വായുസഞ്ചാരമില്ലായ്മയും താങ്ങാനാവാതെ വെറും മൂന്ന് മണിക്കൂറിനുള്ളിൽ കോഴികൾ കൂട്ടത്തോടെ ചത്തുവീഴുകയായിരുന്നു.
വൈദ്യുതി മുടങ്ങിയതിന് പിന്നാലെ കൂളിംഗ് സിസ്റ്റം അടിയന്തരമായി പ്രവർത്തിപ്പിക്കുന്നതിനായി ഡീസൽ ജനറേറ്റർ ഓൺ ചെയ്യാൻ ശ്രമിച്ചതുകൊണ്ടാണ് ബാക്കി കോഴികളെയെങ്കിലും രക്ഷിക്കാൻ കഴിഞ്ഞതെന്ന് ഫാം ഉടമ വ്യക്തമാക്കി. പെട്ടെന്നുണ്ടായ ഈ ദുരന്തം മൂലം ഏകദേശം 15 ലക്ഷം രൂപയുടെ വൻ സാമ്പത്തിക നഷ്ടമാണ് ഫാം ഉടമയ്ക്ക് ഉണ്ടായിരിക്കുന്നത്. ഒഡീഷയുടെ പല ഭാഗങ്ങളിലും നിലവിൽ താപനില റെക്കോർഡ് വേഗതയിലാണ് ഉയരുന്നത്.
Story Summary: Around 5,300 chickens died in a poultry farm in Odisha’s Malkangiri district due to extreme heat after a power outage shut down the farm’s cooling system for three hours. The poultry shed quickly turned into a heat chamber, resulting in a loss of approximately ₹15 lakhs for the farm owner, though a diesel generator eventually saved the remaining livestock.
