ഒഡിഷ സർക്കാർ MLAമാരുടെ ശമ്പളം മൂന്നിരട്ടി വർധിപ്പിച്ചു | Salaries

ഭുവനേശ്വർ: ഒഡിഷ സംസ്ഥാനത്തെ എംഎൽഎമാർക്കുള്ള പ്രതിമാസ ശമ്പളം മൂന്ന് മടങ്ങിലേറെ വർധിപ്പിച്ച് സംസ്ഥാന സർക്കാർ. നിലവിലുണ്ടായിരുന്ന 1.11 ലക്ഷം രൂപ 3.45 ലക്ഷമായാണ് ഉയർത്തിയത്. ഈ ശമ്പള വർധനവിന് 2024 ജൂൺ മാസം മുതൽ മുൻകാല പ്രാബല്യത്തോടെയാണ് നിയമസഭ അംഗീകാരം നൽകിയത്.(Odisha government triples salaries of MLAs)

ബിജെപി ഭരണത്തിന് കീഴിൽ പാർലമെൻ്ററികാര്യ മന്ത്രി മുകേഷ് മഹാലിംഗ് അവതരിപ്പിച്ച ബില്ലിന് നിയമസഭ ഐകകണ്ഠേന അംഗീകാരം നൽകുകയായിരുന്നു. 2007 മുതൽ നിയമസഭാംഗങ്ങൾ ആവശ്യപ്പെട്ടു വന്ന വർധനവാണ് ഇതോടെ യാഥാർത്ഥ്യമായത്.

മുഖ്യമന്ത്രി, മന്ത്രിമാർ, സ്പീക്കർ, ഡെപ്യൂട്ടി സ്പീക്കർ, പ്രതിപക്ഷ നേതാവ് എന്നിവരുടെയും ശമ്പളം ആനുപാതികമായി വർധിപ്പിച്ചു. ശമ്പള വർധനവ് ഇനി ഓരോ അഞ്ച് വർഷം കൂടുമ്പോഴും നടപ്പാക്കാൻ തീരുമാനിച്ചു. സിറ്റിങ് എംഎൽഎ മരിച്ചാൽ കുടുംബത്തിന് 25 ലക്ഷം രൂപ സഹായം നൽകും. ഈ തീരുമാനത്തിന് എല്ലാ അംഗങ്ങളും ഐകകണ്ഠേന മുഖ്യമന്ത്രിക്ക് നന്ദി അറിയിച്ചു.

മുൻ എംഎൽഎമാർക്ക് പ്രതിമാസം 1.17 ലക്ഷം രൂപ പെൻഷനായി ലഭിക്കും. ഇതിൽ 80,000 രൂപ പെൻഷനും 25,000 രൂപ മെഡിക്കൽ അലവൻസും 12,500 രൂപ യാത്രാ ബത്തയുമാണ്. ഒന്നിലേറെ തവണ എംഎൽഎമാരായവർക്ക് ഓരോ തവണയ്ക്കും 3,000 രൂപ അധികമായി ലഭിക്കും.