ശ്രീനഗറിലെ നൗഗാം പോലീസ് സ്റ്റേഷനിൽ കഴിഞ്ഞ രാത്രിയുണ്ടായ വാൻ സ്ഫോടന ദുരന്തത്തെ "നിർഭാഗ്യകരമായ ആകസ്മിക സംഭവം" എന്ന് വിശേഷിപ്പിച്ച് ആഭ്യന്തര മന്ത്രാലയം. നവംബർ 14 ന് രാത്രി 11:20 ന് പോലീസ് സ്റ്റേഷനുള്ളിലാണ് സ്ഫോടനം നടന്നതെന്ന് ജമ്മു കശ്മീർ ഡിവിഷൻ ജോയിന്റ് സെക്രട്ടറി പ്രശാന്ത് ലോഖണ്ഡെ ഒരു ഔദ്യോഗിക പ്രസ്താവനയിൽ പറഞ്ഞിരുന്നു. സംശയാസ്പദമായ ഒരു പോസ്റ്ററിൽ നിന്ന് ലഭിച്ച സൂചനകളുടെ അടിസ്ഥാനത്തിൽ നൗഗാം പോലീസ് അടുത്തിടെ ഒരു ഭീകര മൊഡ്യൂൾ തകർത്തതായി ഉദ്യോഗസ്ഥൻ വിശദീകരിച്ചിരുന്നു. (Nowgam Blast)
സ്ഫോടനത്തെ തുടർന്നുണ്ടായ അന്വേഷണത്തിനിടെ പോലീസ് സ്റ്റേഷന്റെ തുറന്ന സ്ഥലത്ത് നടപടിക്രമങ്ങൾക്ക് വേണ്ടി സൂക്ഷിച്ചിരുന്ന സ്ഫോടക വസ്തുക്കളുടെയും രാസവസ്തുക്കളുടെയും ഒരു വലിയ ശേഖരം ഉദ്യോഗസ്ഥർ കണ്ടെടുത്തു. വെള്ളിയാഴ്ച രാത്രി, പതിവ് നടപടിക്രമത്തിനിടെ, ശക്തമായ ഒരു ആകസ്മിക സ്ഫോടനം ഉണ്ടായി എന്നാണ് അന്വേഷണത്തിൽ നിന്നും ലഭിച്ച വിവരങ്ങൾ അനുസരിച്ചുള്ള നിഗമനം. സ്ഫോടനം ഒമ്പത് പേരുടെ ജീവൻ അപഹരിച്ചു. കൂടാതെ, 27 പോലീസ് ഉദ്യോഗസ്ഥർക്കും രണ്ട് റവന്യൂ ഉദ്യോഗസ്ഥർക്കും മൂന്ന് സാധാരണക്കാർക്കും പരിക്കേറ്റു. സംഭവത്തിൽ പോലീസ് സ്റ്റേഷനും കേടുപാടുകൾ സംഭവിച്ചിട്ടുണ്ട്.
ദുഃഖത്തിന്റെ ഈ വേളയിൽ മരിച്ചവരുടെ കുടുംബങ്ങളോടൊപ്പം സർക്കാർ ഐക്യദാർഢ്യം പ്രഖ്യാപിക്കുകയും പരിക്കേറ്റവർക്ക് എല്ലാ പിന്തുണയും ഉറപ്പ് നൽകുകയും ചെയ്യുന്നു എന്ന് പോലീസ് ഉദ്യോഗസ്ഥർ വ്യക്തമാക്കി.