ന്യൂഡൽഹി: ദേശീയ തലസ്ഥാനമായ ഡൽഹി ഉൾപ്പെടെയുള്ള ഉത്തരേന്ത്യൻ നഗരങ്ങൾ കടുത്ത ശൈത്യത്തിന്റെ പിടിയിലാണ്. ഡൽഹിയിൽ ഇന്ന് രേഖപ്പെടുത്തിയ ഏറ്റവും കുറഞ്ഞ താപനില 2.9 ഡിഗ്രി സെൽഷ്യസ് ആണ്. സാധാരണ ഈ സമയത്ത് ലഭിക്കേണ്ട താപനിലയേക്കാൾ 2 മുതൽ 4 ഡിഗ്രി വരെ കുറവാണ് ഇപ്പോൾ അനുഭവപ്പെടുന്നത്.(North India shivers in cold, Temperature in Delhi drops to 2.9 degrees)
ഡൽഹി കൂടാതെ രാജസ്ഥാൻ, ഉത്തർപ്രദേശ്, ഹരിയാന എന്നീ സംസ്ഥാനങ്ങളിലും തണുപ്പ് കഠിനമാണ്. പലയിടങ്ങളിലും മൂടൽമഞ്ഞ് കാഴ്ചപരിധി കുറച്ചു. കനത്ത പുകമഞ്ഞ് കാരണം ഡൽഹി വിമാനത്താവളത്തിൽ നിന്നുള്ള നിരവധി സർവീസുകൾ വൈകി. റോഡ് ഗതാഗതത്തെയും ട്രെയിൻ സർവീസുകളെയും ഇത് ബാധിച്ചിട്ടുണ്ട്.
വായുമലിനീകരണം കൂടിയത് പുകമഞ്ഞ് രൂക്ഷമാകാൻ കാരണമായി. ഡൽഹിയിലെ വായു ഗുണനിലവാര സൂചിക ഇപ്പോഴും 'വളരെ മോശം' വിഭാഗത്തിലാണ്. തണുപ്പ് ഇതേ നിലയിൽ തുടർന്നാൽ സ്കൂളുകൾക്കും കോളേജുകൾക്കും അവധി നൽകുന്ന കാര്യം സർക്കാർ ഗൗരവമായി പരിഗണിക്കുന്നുണ്ട്.