ചെന്നൈ: പാകിസ്ഥാനെ 'മോശം അയൽക്കാരൻ' എന്ന് വിശേഷിപ്പിച്ച് വിദേശകാര്യ മന്ത്രി എസ്. ജയശങ്കർ. ഐഐടി മദ്രാസിൽ വിദ്യാർത്ഥികളോട് സംസാരിക്കുകയായിരുന്നു അദ്ദേഹം. രാജ്യരക്ഷയ്ക്കായി ഇന്ത്യ സ്വീകരിക്കുന്ന നടപടികളിൽ മറ്റ് രാജ്യങ്ങൾ ഇടപെടേണ്ടതില്ലെന്ന് അദ്ദേഹം ശക്തമായ ഭാഷയിൽ മുന്നറിയിപ്പ് നൽകി.(No one's permission needed to defend Bad neighbors of India, says S Jaishankar)
ഒരു രാജ്യം മനഃപൂർവ്വം ഭീകരവാദം തുടരുകയാണെങ്കിൽ, നമ്മുടെ ജനങ്ങളെ സംരക്ഷിക്കാൻ ഇന്ത്യയ്ക്ക് അവകാശമുണ്ട്. ആ അവകാശം എങ്ങനെ വിനിയോഗിക്കണമെന്ന് തീരുമാനിക്കുന്നത് ഇന്ത്യ മാത്രമായിരിക്കും. നമ്മൾ എന്ത് ചെയ്യണം, ചെയ്യരുത് എന്ന് പറയാൻ ആർക്കും അധികാരമില്ല. കഴിഞ്ഞ വർഷം പാകിസ്ഥാനിലെ ഭീകരകേന്ദ്രങ്ങൾ ലക്ഷ്യമിട്ട് നടത്തിയ 'ഓപ്പറേഷൻ സിന്ദൂർ' പരാമർശിച്ച അദ്ദേഹം, ജനങ്ങളെ സംരക്ഷിക്കാനുള്ള ഇന്ത്യയുടെ ഇച്ഛാശക്തിയുടെ ഉദാഹരണമാണിതെന്ന് ചൂണ്ടിക്കാട്ടി.
പഹൽഗാം ആക്രമണത്തിന് പിന്നാലെ സിന്ധു നദീജല ഉടമ്പടി നിർത്തിവെച്ച നടപടിയെ അദ്ദേഹം ന്യായീകരിച്ചു. ഭീകരവാദം നിലനിൽക്കുമ്പോൾ നല്ല അയൽപക്ക ബന്ധം സാധ്യമല്ലെന്നും, അത്തരം ബന്ധമില്ലെങ്കിൽ അതിന്റെ ഗുണഫലങ്ങൾ പാകിസ്ഥാന് ലഭിക്കില്ലെന്നും അദ്ദേഹം വ്യക്തമാക്കി.
ഇന്ത്യയ്ക്ക് നല്ല അയൽക്കാരുമുണ്ട്. ദോഷം ചെയ്യാത്ത അയൽക്കാരെ സഹായിക്കുകയും അവർക്ക് ദയ കാണിക്കുകയും ചെയ്യുക എന്നതാണ് ഒരു രാജ്യം എന്ന നിലയിൽ ഇന്ത്യയുടെ നയമെന്നും അദ്ദേഹം കൂട്ടിച്ചേർത്തു. ഭീകരവാദത്തോടുള്ള ഇന്ത്യയുടെ 'സീറോ ടോളറൻസ്' നയം ആവർത്തിക്കുന്നതായിരുന്നു വിദേശകാര്യ മന്ത്രിയുടെ വാക്കുകൾ.