ന്യൂഡൽഹി: സൈനികരുടെ സോഷ്യൽ മീഡിയ ഉപയോഗത്തിൽ സുപ്രധാന ഇളവുകളുമായി ഇന്ത്യൻ സൈന്യം. സുരക്ഷാ കാരണങ്ങളാൽ മുൻപ് ഏർപ്പെടുത്തിയ കർശന നിയന്ത്രണങ്ങളിൽ ഭേദഗതി വരുത്തിയാണ് ഡയറക്ടറേറ്റ് ജനറൽ ഓഫ് മിലിട്ടറി ഇന്റലിജൻസ് പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചത്.(No likes and comments, Indian Army makes important amendment to social media policy)
പുതിയ ഭേദഗതി പ്രകാരം സൈനികർക്ക് ഇൻസ്റ്റാഗ്രാം ഉപയോഗിക്കാൻ അനുമതിയുണ്ടെങ്കിലും അത് 'പാസീവ് പാർട്ടിസിപ്പേഷൻ' എന്ന രീതിയിൽ മാത്രമായിരിക്കണം. സൈനികർക്ക് ഇൻസ്റ്റാഗ്രാമിലെ പോസ്റ്റുകൾ കാണാനും വിവരങ്ങൾ നിരീക്ഷിക്കാനും സാധിക്കുമെങ്കിലും പോസ്റ്റുകൾ ലൈക്ക് ചെയ്യാനോ, കമന്റ് ചെയ്യാനോ, ഷെയർ ചെയ്യാനോ അനുവാദമില്ല. കൂടാതെ മറ്റുള്ളവർക്ക് നേരിട്ട് സന്ദേശങ്ങൾ അയക്കുന്നതിനും വിലക്കുണ്ട്. സോഷ്യൽ മീഡിയയിലെ വ്യാജവാർത്തകളും തെറ്റിദ്ധരിപ്പിക്കുന്ന വിവരങ്ങളും ശ്രദ്ധയിൽപ്പെട്ടാൽ അവ ഉടനടി മുതിർന്ന ഉദ്യോഗസ്ഥരെ അറിയിക്കണമെന്നും സൈന്യം നിർദ്ദേശിക്കുന്നു.
ഓരോ പ്ലാറ്റ്ഫോമിനും വ്യത്യസ്തമായ ഉപയോഗ ക്രമമാണ് സൈന്യം നിശ്ചയിച്ചിരിക്കുന്നത്. വാട്ട്സ്ആപ്പ്, സ്കൈപ്പ് എന്നിവ വഴി പൊതുവായ വിവരങ്ങൾ കൈമാറാൻ സൈനികർക്ക് അനുമതിയുണ്ട്. ടെലഗ്രാം, സിഗ്നൽ എന്നിവയിലൂടെ പരിചയമുള്ള ആളുകളുമായി മാത്രം ആശയവിനിമയം നടത്താം. സന്ദേശം സ്വീകരിക്കുന്ന ആളെ കൃത്യമായി തിരിച്ചറിയേണ്ട ഉത്തരവാദിത്വം സൈനികനായിരിക്കും.
യൂട്യൂബ്, എക്സ് (X), ക്വോറ എന്നീ മാധ്യമങ്ങളിലൂടെ വിവരങ്ങൾ ശേഖരിക്കാൻ അനുമതിയുണ്ട്. എന്നാൽ സ്വന്തം നിലയിൽ വിവരങ്ങളോ സന്ദേശങ്ങളോ അപ്ലോഡ് ചെയ്യാൻ പാടില്ല. ലിങ്ക്ഡ്ഇനിൽ തൊഴിൽപരമായ ആവശ്യങ്ങൾക്കായി മാത്രം ബയോഡാറ്റ അപ്ലോഡ് ചെയ്യാൻ അനുവാദമുണ്ട്. വിവരസാങ്കേതിക അവബോധം വളർത്തുന്നതിനാണ് ഈ ഇളവുകൾ നൽകിയിരിക്കുന്നതെങ്കിലും സുരക്ഷാ കാര്യങ്ങളിൽ വിട്ടുവീഴ്ചയില്ലെന്ന് സൈന്യം വ്യക്തമാക്കി. വിപിഎൻ (VPN), ടോറന്റ് വെബ്സൈറ്റുകൾ, ക്രാക്ക്ഡ് സോഫ്റ്റ്വെയറുകൾ, അജ്ഞാത വെബ് പ്രോക്സികൾ എന്നിവ ഉപയോഗിക്കുന്നതിനെതിരെ സൈന്യം കർശന മുന്നറിയിപ്പ് നൽകി.