ന്യൂഡൽഹി: ബിജെപിയുടെ പുതിയ ദേശീയ അധ്യക്ഷനായി നിതിൻ നബിൻ ഔദ്യോഗികമായി ചുമതലയേറ്റു. ജെ.പി. നഡ്ഡയുടെ പിൻഗാമിയായി എത്തുന്ന 45-കാരനായ നിതിൻ നബിൻ, പാർട്ടിയുടെ ചരിത്രത്തിലെ ഏറ്റവും പ്രായം കുറഞ്ഞ അധ്യക്ഷനാണ്. പ്രധാനമന്ത്രി നരേന്ദ്ര മോദി, കേന്ദ്രമന്ത്രിമാർ, വിവിധ സംസ്ഥാനങ്ങളിലെ മുഖ്യമന്ത്രിമാർ തുടങ്ങിയ ഉന്നത നേതാക്കളുടെ സാന്നിധ്യത്തിലാണ് സ്ഥാനാരോഹണം നടന്നത്.
ബിജെപിയുടെ ദേശീയ അധ്യക്ഷസ്ഥാനത്തെത്തുന്ന പന്ത്രണ്ടാമത്തെ നേതാവാണ് നിതിൻ. യുവനേതൃത്വത്തിന് പ്രാധാന്യം നൽകുന്നതിന്റെ ഭാഗമായി വർക്കിങ് പ്രസിഡന്റ് സ്ഥാനത്ത് നിന്നാണ് അദ്ദേഹം ദേശീയ അധ്യക്ഷനായി ഉയർത്തപ്പെട്ടത്. ബിഹാറിൽ നിന്നുള്ള മുതിർന്ന നേതാവായിരുന്ന നബിൻ കിഷോർ പ്രസാദിന്റെ മകനാണ് നിതിൻ നബിൻ. ബിഹാർ ബിജെപിയിലെ പ്രധാന മുഖമായ അദ്ദേഹം ഛത്തീസ്ഗഡിന്റെ ചുമതലയുള്ള ജനറൽ സെക്രട്ടറിയായും ശ്രദ്ധേയമായ പ്രവർത്തനം കാഴ്ചവെച്ചിട്ടുണ്ട്.
വരാനിരിക്കുന്ന നിർണ്ണായക നിയമസഭാ തെരഞ്ഞെടുപ്പുകൾക്കും പാർട്ടിയുടെ അടിത്തറ വികസിപ്പിക്കുന്നതിനും യുവനേതൃത്വത്തിന്റെ ഈ മാറ്റം ഊർജ്ജം പകരുമെന്നാണ് പാർട്ടി വിലയിരുത്തുന്നത്.