'ബൂത്ത് തലത്തിൽ പാർട്ടി ശക്തിപ്പെടണം, കേരളത്തിലും തമിഴ്നാട്ടിലും മികച്ച പ്രകടനം നടത്താൻ കഴിയും'; നിതിൻ നബീൻ | Nitin Nabin

നിയമസഭാ തിരഞ്ഞെടുപ്പ് നടക്കാനിരിക്കുന്ന കേരളം ഉൾപ്പെടെയുള്ള അഞ്ച് സംസ്ഥാനങ്ങളിൽ പാർട്ടിയെ താഴെത്തട്ടിൽ ശക്തിപ്പെടുത്താൻ ബിജെപി ദേശീയ അധ്യക്ഷൻ നിതിൻ നബീൻ (Nitin Nabin) നിർദ്ദേശം നൽകി. എംപിമാർ സ്വന്തം മണ്ഡലങ്ങളിലെ ബൂത്തുകൾ നേരിട്ട് സന്ദർശിക്കണമെന്നും സംഘടനയെ കൂടുതൽ ഊർജ്ജസ്വലമാക്കണമെന്നുമാണ് അദ്ദേഹം ആവശ്യപ്പെട്ടത്. പുതിയ ദേശീയ അധ്യക്ഷനായി ചുമതലയേറ്റ ശേഷം വിളിച്ചുചേർത്ത ആദ്യ യോഗത്തിലാണ് തിരഞ്ഞെടുപ്പ് മുന്നൊരുക്കങ്ങൾ അദ്ദേഹം വിലയിരുത്തിയത്.

കേരളത്തിലും തമിഴ്‌നാട്ടിലും ഇത്തവണ ബിജെപിക്ക് മികച്ച പ്രകടനം കാഴ്ചവെക്കാൻ കഴിയുന്ന സാഹചര്യമാണെന്ന് യോഗത്തിൽ നേതാക്കൾ അഭിപ്രായപ്പെട്ടു. പശ്ചിമ ബംഗാളിൽ ഇത്തവണ ബിജെപി സർക്കാർ രൂപീകരിക്കാനുള്ള അനുകൂല ഘടകങ്ങൾ നിലവിലുണ്ടെന്നാണ് ദേശീയ നേതൃത്വത്തിന്റെ വിലയിരുത്തൽ. ബൂത്ത് തല കമ്മിറ്റികൾ ശക്തിപ്പെടുത്തി എൻഡിഎയുടെ പ്രവർത്തനം ജനങ്ങളിലേക്ക് നേരിട്ട് എത്തിക്കാനാണ് ലക്ഷ്യമിടുന്നത്.

അതേസമയം, കേരളത്തിൽ നിയമസഭാ തിരഞ്ഞെടുപ്പിനുള്ള സീറ്റ് വിഭജന ചർച്ചകളിലേക്ക് എൻഡിഎ കടന്നു കഴിഞ്ഞു. ബിജെപിയും ഘടകകക്ഷികളും തമ്മിലുള്ള പ്രാഥമിക ചർച്ചകൾ ഇന്ന് തിരുവനന്തപുരത്ത് നടക്കും. എൻഡിഎയിലെ പ്രധാന കക്ഷിയായ ബിഡിജെഎസ് (BDJS) 40 സീറ്റുകൾ ആവശ്യപ്പെടാൻ തീരുമാനിച്ചിട്ടുണ്ട്. പറവൂർ മണ്ഡലത്തിൽ പ്രതിപക്ഷ നേതാവ് വി.ഡി. സതീശനെതിരെ തുഷാർ വെള്ളാപ്പള്ളി മത്സരിക്കുന്ന കാര്യവും ബിഡിജെഎസിന്റെ പരിഗണനയിലുണ്ട്.

മറ്റ് ഘടകകക്ഷികളായ കേരള കാമരാജ് കോൺഗ്രസും സോഷ്യലിസ്റ്റ് ജനതാദളും ഏഴ് സീറ്റുകൾ വീതം ആവശ്യപ്പെടുമ്പോൾ, നാഷണലിസ്റ്റ് കേരള കോൺഗ്രസ് അഞ്ച് സീറ്റുകൾ ചോദിക്കും. വട്ടിയൂർക്കാവ്, കൊടുങ്ങല്ലൂർ, തൃപ്പൂണിത്തുറ, കരുനാഗപ്പള്ളി തുടങ്ങിയ മണ്ഡലങ്ങൾ ബിഡിജെഎസ് ആവശ്യപ്പെടാനാണ് സാധ്യത. പാറശാല മണ്ഡലം ഇതിനകം തന്നെ കേരള കാമരാജ് കോൺഗ്രസിന് നൽകിയതായാണ് സൂചന. വരും ദിവസങ്ങളിൽ സീറ്റ് വിഭജനം സംബന്ധിച്ച കൂടുതൽ ഉഭയകക്ഷി ചർച്ചകൾ നടക്കും.