ന്യൂഡൽഹി: ഉഭയകക്ഷി ബന്ധം ശക്തമാക്കുന്നതിന്റെ ഭാഗമായി കേന്ദ്ര ധനമന്ത്രി നിർമല സീതാരാമൻ രണ്ട് ദിവസത്തെ ഔദ്യോഗിക സന്ദർശനത്തിനായി നോർവേയിലെത്തി. ഓസ്ലോ വിമാനത്താവളത്തിൽ എത്തിയ മന്ത്രിയെ നോർവേയിലെ ഇന്ത്യൻ അംബാസഡർ ഗ്ലോറിയ ഗാങ്തെ സ്വീകരിച്ചു.(Nirmala Sitharaman in Norway, The goal is economic cooperation)
സാമ്പത്തിക സഹകരണം, നിക്ഷേപം, പുതിയ സംരംഭങ്ങൾ എന്നിവയാണ് സന്ദർശനത്തിലെ പ്രധാന അജണ്ടകൾ. നോർവേയിലെ ഉന്നത നേതാക്കളുമായും ഭരണാധികാരികളുമായും മന്ത്രി ചർച്ചകൾ നടത്തും. നോർവേ പ്രധാനമന്ത്രി യോനാസ് ഗാഹ് സ്റ്റോറുമായി മന്ത്രി കൂടിക്കാഴ്ച നടത്തും. കൂടാതെ ധനമന്ത്രി ജെൻസ് സ്റ്റോൾട്ടൻബർഗ്, വ്യാപാര-വ്യവസായ മന്ത്രി സിസിലി മിർസെത്ത് എന്നിവരുമായി നടത്തുന്ന ഉഭയകക്ഷി ചർച്ചകൾ ഇരുരാജ്യങ്ങളും തമ്മിലുള്ള വ്യാപാര ബന്ധത്തിൽ നിർണ്ണായകമാകും.
നോർവേയിലെ പ്രമുഖ സിഇഒമാരുമായും നിക്ഷേപകരുമായും മന്ത്രി സംവദിക്കും. ഇന്ത്യയിലെ നിക്ഷേപ സാധ്യതകൾ വർദ്ധിപ്പിക്കുക എന്ന ലക്ഷ്യത്തോടെയാണ് ഈ വട്ടമേശ ചർച്ച സംഘടിപ്പിച്ചിരിക്കുന്നത്. പുതിയ ആശയങ്ങളെ പ്രോത്സാഹിപ്പിക്കുന്നതിന്റെ ഭാഗമായി ഓസ്ലോ സയൻസ് പാർക്ക് മന്ത്രി സന്ദർശിക്കും.
