കൊൽക്കത്ത: പശ്ചിമ ബംഗാളിൽ നിപ വൈറസ് പടരുന്നതായി റിപ്പോർട്ടുകൾ. കല്യാണി എയിംസിലെ വൈറസ് റിസർച്ച് ആൻഡ് ഡയഗ്നോസ്റ്റിക് ലബോറട്ടറിയിൽ നടത്തിയ പരിശോധനയിലാണ് രോഗബാധ സ്ഥിരീകരിച്ചത്. കൂടുതൽ പേർ നിരീക്ഷണത്തിലാണെന്നും ആരോഗ്യവകുപ്പ് സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണെന്നും അധികൃതർ അറിയിച്ചു.(Nipah virus outbreak in West Bengal, High alert)
വവ്വാലുകളിൽ നിന്ന് പടരുന്ന മാരകമായ ഒരു വൈറസ് രോഗമാണിത്. മനുഷ്യരിലും മൃഗങ്ങളിലും ഒരുപോലെ അണുബാധയുണ്ടാക്കാൻ ഇതിന് ശേഷിയുണ്ട്. ഉയർന്ന മരണനിരക്കുള്ള ഈ രോഗം പന്നികൾ, ആട്, കുതിര, നായ, പൂച്ച എന്നിവയിലൂടെയും പടരാം.
രോഗബാധിതരായ മൃഗങ്ങളുടെ രക്തം, മലം, മൂത്രം, ഉമിനീർ എന്നിവയുമായുള്ള സമ്പർക്കം, വവ്വാലുകൾ കടിച്ച പഴങ്ങളോ അവയുടെ കാഷ്ഠം കലർന്ന പാനീയങ്ങളോ കഴിക്കുന്നത് വഴി, രോഗബാധിതരായ വ്യക്തികളെ പരിചരിക്കുമ്പോൾ സ്രവങ്ങളിലൂടെ എന്നിങ്ങനെ രോഗം മറ്റൊരാളിലേക്ക് പടരാം.
പ്രധാന ലക്ഷണങ്ങൾ
വൈറസ് ബാധയേറ്റ് 4 മുതൽ 14 ദിവസങ്ങൾക്കുള്ളിലാണ് സാധാരണയായി ലക്ഷണങ്ങൾ കണ്ടുതുടങ്ങുന്നത്. കടുത്ത പനിയും തലവേദനയും, ശ്വാസംമുട്ടലും വിട്ടുമാറാത്ത ചുമയും, പേശി വേദനയും കടുത്ത ബലഹീനതയും, തലകറക്കം, ബോധക്ഷയം, കാഴ്ചമങ്ങൽ, വയറുവേദന, ഛർദ്ദി, അവ്യക്തമായ സംസാരം എന്നിവയാണ് ലക്ഷണങ്ങൾ.
മുൻകരുതലുകൾ
രോഗബാധിതരായ മൃഗങ്ങളുമായോ വ്യക്തികളുമായോ ഉള്ള നേരിട്ടുള്ള സമ്പർക്കം ഒഴിവാക്കുക. വവ്വാലുകൾ കടിച്ചിട്ടുള്ളതോ നിലത്തു വീണതോ ആയ പഴങ്ങൾ കഴിക്കരുത്. രോഗികളെ പരിചരിക്കുമ്പോൾ മാസ്ക്, ഗ്ലൗസ് തുടങ്ങിയ സുരക്ഷാ ഉപകരണങ്ങൾ നിർബന്ധമായും ഉപയോഗിക്കുക.കൈകൾ ഇടയ്ക്കിടെ സോപ്പും വെള്ളവും ഉപയോഗിച്ച് കഴുകുക.