കൊൽക്കത്ത: പശ്ചിമ ബംഗാളിൽ നിപ വൈറസ് ബാധ അതിവേഗം പടരുന്നതായി റിപ്പോർട്ട്. കഴിഞ്ഞ ഒരാഴ്ചയ്ക്കുള്ളിൽ അഞ്ച് പേർക്കാണ് രോഗം സ്ഥിരീകരിച്ചത്. രോഗബാധിതരുമായി സമ്പർക്കത്തിലുണ്ടായിരുന്ന നൂറോളം പേരെ ആരോഗ്യവകുപ്പ് ഹോം ക്വാറന്റൈനിൽ പ്രവേശിപ്പിച്ചു. (Nipah virus outbreak in West Bengal, 5 people infected in a week)
രോഗം സ്ഥിരീകരിച്ചവരിൽ രണ്ട് നഴ്സുമാരും ഉൾപ്പെടുന്നു. ഇതിൽ ഒരാളുടെ ആരോഗ്യനില മെച്ചപ്പെട്ടതായും മറ്റേയാൾ ഇപ്പോഴും അതീവ ഗുരുതരാവസ്ഥയിൽ തുടരുകയാണെന്നും ആരോഗ്യവകുപ്പ് അറിയിച്ചു. വൈറസ് വ്യാപനം തടയാൻ ബാധിക്കപ്പെട്ട മേഖലകളിൽ കനത്ത ജാഗ്രതയാണ് പുലർത്തുന്നത്.
മൃഗങ്ങളിൽ നിന്ന് മനുഷ്യരിലേക്ക് പകരുന്ന ജന്തുജന്യ രോഗമാണ് നിപ. 'റ്റീറോപ്പസ്' ഇനത്തിൽപ്പെട്ട വവ്വാലുകളിൽ നിന്നോ പന്നികളിൽ നിന്നോ ആണ് പ്രധാനമായും വൈറസ് മനുഷ്യരിലെത്തുന്നത്. രോഗബാധിതരായ വ്യക്തികളിൽ നിന്ന് മറ്റുള്ളവരിലേക്കും ശ്വസനത്തിലൂടെയോ ശരീരദ്രാവകങ്ങളിലൂടെയോ രോഗം പകരാം.
സാധാരണ പനി മുതൽ ശ്വാസകോശ സംബന്ധമായ അസുഖങ്ങൾക്കും തലച്ചോറിനെ ബാധിക്കുന്ന എൻസെഫലൈറ്റിസിനും നിപ കാരണമായേക്കാമെന്ന് ലോകാരോഗ്യ സംഘടന മുന്നറിയിപ്പ് നൽകുന്നു. രോഗവ്യാപനം തടയാൻ ഇടയ്ക്കിടെ കൈകൾ സോപ്പിട്ട് കഴുകുകയോ സാനിറ്റൈസർ ഉപയോഗിക്കുകയോ ചെയ്യുക.
അസുഖമുള്ള പന്നികളുമായോ വവ്വാലുകളുമായോ നേരിട്ടുള്ള സമ്പർക്കം ഒഴിവാക്കുക. പഴങ്ങൾ കഴിക്കുന്നതിന് മുൻപ് നന്നായി കഴുകി തൊലി കളയുക. വവ്വാൽ കടിച്ചതോ പോറലേറ്റതോ ആയ പഴങ്ങൾ സ്പർശിക്കാനോ കഴിക്കാനോ പാടില്ല. വവ്വാലുകൾ കൂടുതലായി കാണപ്പെടുന്ന സ്ഥലങ്ങളിൽ പോകുന്നത് ഒഴിവാക്കുക. വവ്വാലിന്റെ കാഷ്ഠം കലർന്ന പാനീയങ്ങൾ ഉപയോഗിക്കരുത്. വൈറസ് ബാധിച്ച വ്യക്തിയുടെ ഉമിനീർ, രക്തം അല്ലെങ്കിൽ മറ്റ് ശരീര ദ്രാവകങ്ങൾ എന്നിവയുമായി നേരിട്ടുള്ള സമ്പർക്കം ഒഴിവാക്കുക. രോഗികളെ പരിചരിക്കുമ്പോൾ മാസ്കും ഗ്ലൗസും നിർബന്ധമായും ധരിക്കുക.