ന്യൂഡൽഹി: ഖാലിസ്ഥാൻ നേതാവ് ഹർദീപ് സിംഗ് നിജ്ജറിൻ്റെ കൊലപാതകത്തിൽ ഇന്ത്യയ്ക്ക് പങ്കുണ്ടെന്ന് ആരോപിക്കുന്ന ബ്ലൂംബെർഗ് ഒറിജിനൽസിൻ്റെ ഡോക്യുമെന്ററി വിവാദങ്ങൾക്ക് തിരികൊളുത്തി. കൊലപാതകവുമായി ബന്ധപ്പെട്ട് ബ്രിട്ടീഷ് രഹസ്യാന്വേഷണ വിഭാഗം ശേഖരിച്ച നിർണ്ണായക വിവരങ്ങൾ കാനഡയ്ക്ക് കൈമാറിയെന്നും ഡോക്യുമെന്ററി അവകാശപ്പെടുന്നു.(Nijjar killing, Controversial documentary alleges India's role)
ബ്ലൂംബെർഗ് ഒറിജിനൽസ് നിർമ്മിച്ച 'ഇൻസൈഡ് ദി ഡെത്ത്‌സ് ദാറ്റ് റോക്ക്ഡ് ഇന്ത്യാസ് റിലേഷൻസ് വിത്ത് ദി വെസ്റ്റ്' എന്ന ഡോക്യുമെന്ററിയിലാണ് ഈ വെളിപ്പെടുത്തൽ. യുകെ, യു.എസ്., കാനഡ, ഓസ്ട്രേലിയ, ന്യൂസിലൻഡ് എന്നീ രാജ്യങ്ങൾക്കിടയിലുള്ള 'ഫൈവ് ഐസ്' രഹസ്യാന്വേഷണ പങ്കുവെക്കൽ കരാർ പ്രകാരമാണ് ബ്രിട്ടീഷ് ഇൻ്റലിജൻസ്, കനേഡിയൻ അധികൃതർക്ക് വിവരം കൈമാറിയത്.
2023 ജൂണിലാണ് ഖാലിസ്ഥാൻ തീവ്രവാദിയായി ഇന്ത്യ പ്രഖ്യാപിച്ച നിജ്ജർ കൊല്ലപ്പെടുന്നത്. 2023 ജൂലൈ അവസാനത്തിൽ, യുകെ ഏജൻസികൾ നടത്തിയ അന്വേഷണത്തിൽ ഒരു 'വഴിത്തിരിവ്' ഉണ്ടായതായി ഡോക്യുമെന്ററി അവകാശപ്പെടുന്നു.
ഇന്ത്യൻ സർക്കാരിനു വേണ്ടി പ്രവർത്തിക്കുന്നു എന്ന് വിശ്വസിക്കപ്പെടുന്ന രണ്ട് വ്യക്തികൾ തമ്മിലുള്ള സംഭാഷണം ബ്രിട്ടീഷ് ഏജൻസി ചോർത്തിയെന്ന് ഇതിൽ പറയുന്നു. നിജ്ജർ, ഖണ്ഡ (അവതാർ സിംഗ്), പന്നുൻ (ഗുർപത്വന്ത് സിംഗ്) എന്നിവരായിരുന്നു ഇന്ത്യയുടെ ലക്ഷ്യമെന്നും, നിജ്ജറിനെ എങ്ങനെ വിജയകരമായി ഇല്ലാതാക്കി എന്നതിനെക്കുറിച്ച് സംഭാഷണം നടന്നുവെന്നും ഡോക്യുമെന്ററി അവകാശപ്പെട്ടു.
നിജ്ജറിനെ കൂടാതെ ഇന്ത്യൻ ലക്ഷ്യമായി ഡോക്യുമെന്ററിയിൽ പറയുന്ന അവതാർ സിംഗ് ഖണ്ഡയും 2023 ജൂണിൽ ഇംഗ്ലണ്ടിലെ ബർമിംഗ്ഹാം നഗരത്തിലെ ആശുപത്രിയിൽ വെച്ച് മരണമടഞ്ഞിരുന്നു. രക്താർബുദം ബാധിച്ചതിനെത്തുടർന്ന് ചികിത്സയിലിരിക്കെയാണ് മരണം സംഭവിച്ചത്. മരണത്തിൽ ദുരൂഹതയുണ്ടെന്ന് ആരോപണങ്ങൾ ഉയർന്നുവെങ്കിലും സംശയാസ്പദമായ സാഹചര്യങ്ങളൊന്നുമില്ല എന്ന് ബ്രിട്ടീഷ് അധികൃതർ വിധിയെഴുതി.
നിജ്ജർ വധിക്കപ്പെട്ടതിൽ ഇന്ത്യക്ക് പങ്കുണ്ടെന്ന് അന്നത്തെ പ്രധാനമന്ത്രി ജസ്റ്റിൻ ട്രൂഡോ ആരോപിച്ചിരുന്നു. ഇതിനെത്തുടർന്ന് ഇരുരാഷ്ട്രങ്ങളും തമ്മിലുള്ള ബന്ധം വഷളാവുകയും നയതന്ത്ര ഉദ്യോഗസ്ഥരെ പരസ്പരം പുറത്താക്കുകയും ചെയ്തിരുന്നു. എന്നാൽ, ട്രൂഡോയുടെ ആരോപണത്തിന് വിപരീതമായി, നിജ്ജറിൻ്റെ വധവുമായി വിദേശരാജ്യങ്ങൾക്ക് ബന്ധമുണ്ടെന്നതിന് വ്യക്തമായ തെളിവില്ലെന്നാണ് കാനഡ അന്വേഷണ കമ്മീഷൻ പുറത്തുവിട്ട റിപ്പോർട്ടിൽ പറയുന്നത്.