ന്യൂഡൽഹി : നാഷണൽ ഹെറാൾഡ് കള്ളപ്പണം വെളുപ്പിക്കൽ കേസിൽ മുതിർന്ന കോൺഗ്രസ് നേതാക്കളായ രാഹുൽ ഗാന്ധിക്കും സോണിയാ ഗാന്ധിക്കുമെതിരെ ക്രിമിനൽ ഗൂഢാലോചന കുറ്റം ചുമത്തി ഡൽഹി പോലീസ് പുതിയ എഫ്.ഐ.ആർ. രജിസ്റ്റർ ചെയ്തു. ഡൽഹി പോലീസിന്റെ ഇക്കണോമിക് ഒഫൻസസ് വിംഗ് ആണ് ആറ് പേർക്കെതിരെ പുതിയ കേസ് രജിസ്റ്റർ ചെയ്തത്.(National Herald case, New FIR against Rahul Gandhi and Sonia Gandhi)
സോണിയാ ഗാന്ധി ഒന്നാം പ്രതിയും രാഹുൽ ഗാന്ധി രണ്ടാം പ്രതിയുമാണ്. ഇവരെ കൂടാതെ സാം പിത്രോദയും മറ്റ് മൂന്ന് വ്യക്തികളും കേസിൽ പ്രതികളാണ്. അസോസിയേറ്റഡ് ജേണൽസ് ലിമിറ്റഡ് (AJL), യംഗ് ഇന്ത്യൻ, ഡോട്ടെക്സ് മർച്ചന്റൈസ് പ്രൈവറ്റ് ലിമിറ്റഡ് എന്നിവയാണിത്. പ്രവർത്തനരഹിതമായ നാഷണൽ ഹെറാൾഡ് പത്രത്തിന്റെ മാതൃകമ്പനിയായ അസോസിയേറ്റഡ് ജേണൽസ് ലിമിറ്റഡിനെ (AJL) വഞ്ചനാപരമായി കൈവശപ്പെടുത്താൻ ക്രിമിനൽ ഗൂഢാലോചന നടത്തിയെന്നാണ് പ്രധാന ആരോപണം.
കൊൽക്കത്ത ആസ്ഥാനമായുള്ള ഷെൽ കമ്പനിയായ ഡോട്ടെക്സ് മർച്ചന്റൈസ് ലാഭേച്ഛയില്ലാതെ പ്രവർത്തിക്കുന്ന കമ്പനിയായ യംഗ് ഇന്ത്യന് ഒരു കോടി രൂപ നൽകി. യംഗ് ഇന്ത്യൻ കമ്പനിയിൽ രാഹുൽ ഗാന്ധിക്കും സോണിയാ ഗാന്ധിക്കും 76% ഓഹരിയുണ്ട്. ഈ ഇടപാടിലൂടെ, യംഗ് ഇന്ത്യൻ കോൺഗ്രസിന് 50 ലക്ഷം രൂപ നൽകുകയും ഏകദേശം ₹2,000 കോടി രൂപയുടെ ആസ്തിയുള്ള AJL-ന്റെ നിയന്ത്രണം നേടുകയും ചെയ്തു എന്നാണ് ആരോപണം.
2012-ൽ ബി.ജെ.പി. നേതാവ് സുബ്രഹ്മണ്യൻ സ്വാമി പ്രാദേശിക കോടതിയിൽ കേസ് ഫയൽ ചെയ്തതോടെയാണ് നാഷണൽ ഹെറാൾഡ് കേസ് ആരംഭിക്കുന്നത്. 1938-ൽ ജവഹർലാൽ നെഹ്റു സ്ഥാപിച്ച AJL-നെ ഏറ്റെടുത്തതിൽ കോൺഗ്രസ് നേതാക്കൾ വഞ്ചനയും വിശ്വാസലംഘനവും നടത്തിയെന്ന് സ്വാമി ആരോപിച്ചു. സാമ്പത്തിക പ്രതിസന്ധി കാരണം 2008-ൽ പത്രത്തിന്റെ പ്രസിദ്ധീകരണം നിർത്തിയപ്പോൾ മാതൃകമ്പനിക്ക് 90 കോടിയുടെ കടമുണ്ടായിരുന്നു. AJL-നെ സഹായിക്കാൻ കോൺഗ്രസ് പാർട്ടി 10 വർഷത്തിനിടെ ₹90 കോടി വായ്പ നൽകിയെന്നും, വായ്പ തിരിച്ചടയ്ക്കാൻ കഴിയാതെ വന്നപ്പോൾ അത് ഇക്വിറ്റി ഓഹരികളാക്കി മാറ്റിയെന്നുമാണ് കോൺഗ്രസ് പറയുന്നത്. പാർട്ടിക്ക് നേരിട്ട് ഓഹരികൾ സ്വന്തമാക്കാൻ കഴിയാത്തതിനാൽ, 2010-ൽ രൂപീകരിച്ച ലാഭേച്ഛയില്ലാതെ പ്രവർത്തിക്കുന്ന കമ്പനിയായ യംഗ് ഇന്ത്യന് ഓഹരികൾ അനുവദിച്ചു.
എൻഫോഴ്സ്മെന്റ് ഡയറക്ടറേറ്റ് (ഇ.ഡി.) നൽകിയ പരാതിയുടെ അടിസ്ഥാനത്തിൽ ഒക്ടോബർ മൂന്നിനാണ് ഡൽഹി പോലീസ് പുതിയ എഫ്.ഐ.ആർ. രജിസ്റ്റർ ചെയ്തത്. പ്രിവൻഷൻ ഓഫ് മണി ലോണ്ടറിംഗ് ആക്ട് സെക്ഷൻ 66(2) പ്രകാരം ഏതൊരു ഏജൻസിയോടും ഷെഡ്യൂൾഡ് കുറ്റകൃത്യം രജിസ്റ്റർ ചെയ്യാനും അന്വേഷിക്കാനും ആവശ്യപ്പെടാൻ ഇ.ഡിക്ക് അധികാരമുണ്ട്. നാഷണൽ ഹെറാൾഡ് കേസിൽ ഡൽഹി കോടതി വിധി പറയുന്നത് ഡിസംബർ 16-ലേക്ക് മാറ്റിവെച്ചതിന് പിന്നാലെയാണ് പുതിയ എഫ്.ഐ.ആർ. വിവരങ്ങൾ പുറത്തുവന്നത്.