മുംബൈ: ലോക്കൽ ട്രെയിനിൽ ഉണ്ടായ വാക്കുതർക്കം കൊലപാതകത്തിലേക്ക് വഴിമാറി (Mumbai Local Train Murder). മുംബൈയിലെ അന്ധേരി-ബോറിവാലി റൂട്ടിൽ സർവീസ് നടത്തിയിരുന്ന ട്രെയിനിൽ 22 വയസുകാരനായ മായങ്ക് ലോഹറാണ് സഹയാത്രികന്റെ കുത്തേറ്റ് മരിച്ചത്.
കനത്ത മഴയെ തുടർന്ന് കോച്ചിന്റെ വാതിൽ തുറന്നുവെച്ചതിനെ ചൊല്ലിയുള്ള തർക്കമാണ് സംഭവത്തിന് പിന്നിലെന്നാണ് പ്രാഥമിക അന്വേഷണത്തിൽ വ്യക്തമായത്. വാക്കേറ്റം രൂക്ഷമായതോടെ പ്രതി മായങ്കിനെ കത്തി ഉപയോഗിച്ച് ആക്രമിക്കുകയായിരുന്നുവെന്ന് പൊലീസ് അറിയിച്ചു.
ഫസ്റ്റ് ലോക്കൽ ട്രെയിനിലെ ഫസ്റ്റ് ക്ലാസ് കോച്ചിലായിരുന്നു സംഭവം. ആക്രമണത്തിൽ വയറിന് ഗുരുതരമായി പരിക്കേറ്റ മായങ്കിനെ യാത്രക്കാരുടെ വിവരത്തെ തുടർന്ന് എത്തിയ റെയിൽവേ പൊലീസ് (GRP)യും റെയിൽവേ പ്രൊട്ടക്ഷൻ ഫോഴ്സ് (RPF) ഉദ്യോഗസ്ഥരും ചേർന്ന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
ചൊവ്വാഴ്ച രാത്രി 10.42ഓടെ ട്രെയിൻ ചര്ച്ച്ഗേറ്റിൽ നിന്ന് നല്ലസോപാരയിലേക്കുള്ള യാത്രയ്ക്കിടെ ഇരുവരും തമ്മിലുള്ള തർക്കം കൈയാങ്കളിയിലേക്ക് മാറുകയായിരുന്നു. ട്രെയിൻ സ്റ്റേഷനിലെത്തും മുമ്പ് തന്നെ പ്രതി കോച്ചിൽ നിന്ന് ചാടി രക്ഷപ്പെട്ടതായും പൊലീസ് വ്യക്തമാക്കി.
സംഭവവുമായി ബന്ധപ്പെട്ട് സിസിടിവി ദൃശ്യങ്ങൾ ഉൾപ്പെടെ പരിശോധിച്ച് അന്വേഷണം പുരോഗമിക്കുകയാണ്. പ്രതിയെ കണ്ടെത്തുന്നതിനായി പ്രത്യേക അന്വേഷണ സംഘം തിരച്ചിൽ ശക്തമാക്കിയിട്ടുണ്ട്. കേസിന്റെ അന്വേഷണം ജിആർപിയുടെ നേതൃത്വത്തിലാണ് നടക്കുന്നത്.
Story Summary: A 22-year-old man was stabbed to death inside a Mumbai local train following an argument over keeping the coach door open during heavy rain. Police have launched a search for the accused, who fled before the train reached the station.
