മുംബൈ: തിരക്കേറിയ മുംബൈ നഗരത്തിലെ ട്രാഫിക് ബ്ലോക്കിൽ കുടുങ്ങിയ ആംബുലൻസിന് രക്ഷകനായി അവതരിച്ച ബൈക്ക് യാത്രികന്റെ വീഡിയോ സോഷ്യൽ മീഡിയയിൽ തരംഗമാകുന്നു (Mumbai Biker Helps Ambulance). മാർച്ച് 18-ന് മയൂർ ബാഗുൽ എന്ന യുവാവ് തന്റെ അമ്മയുമായി ബദ്ലാപൂരിൽ നിന്ന് സയൺ ആശുപത്രിയിലേക്ക് പോകുന്നതിനിടെയാണ് സംഭവം. ആശുപത്രിയിലേക്കുള്ള യാത്രയ്ക്കിടെ കനത്ത ട്രാഫിക് ബ്ലോക്കിൽ ആംബുലൻസ് കുടുങ്ങിയത് മയൂരിനെയും കുടുംബത്തെയും ഏറെ ആശങ്കയിലാഴ്ത്തിയിരുന്നു.
ആംബുലൻസിന് മുന്നോട്ട് നീങ്ങാൻ കഴിയാത്ത സാഹചര്യത്തിലാണ് ഒരു ബൈക്ക് യാത്രികൻ സഹായത്തിനെത്തിയത്. ഇൻസ്റ്റാഗ്രാമിൽ പങ്കുവെച്ച വീഡിയോയിൽ, ഈ യുവാവ് ആംബുലൻസിന് മുന്നിലായി ബൈക്ക് ഓടിക്കുകയും മറ്റ് വാഹനങ്ങൾക്ക് സിഗ്നൽ നൽകി വഴി മാറ്റുകയും ചെയ്യുന്നത് കാണാം. ഒരു ട്രാഫിക് പോലീസ് ഉദ്യോഗസ്ഥനെപ്പോലെ ആംബുലൻസിന് മുന്നിൽ നിന്ന് വഴിയൊരുക്കിയ ഇയാൾ, വാഹനം ആശുപത്രിയിൽ എത്തുന്നത് വരെ കൂടെയുണ്ടായിരുന്നു. കൃത്യസമയത്ത് ആശുപത്രിയിൽ എത്താൻ സഹായിച്ച ഈ അപരിചിതനായ സഹോദരനോട് വാക്കുകൾക്ക് അതീതമായ നന്ദിയുണ്ടെന്ന് മയൂർ ഇൻസ്റ്റാഗ്രാമിൽ കുറിച്ചു.
സോഷ്യൽ മീഡിയയിൽ വീഡിയോ വൈറലായതോടെ വലിയ രീതിയിലുള്ള പ്രശംസയാണ് ബൈക്ക് യാത്രികന് ലഭിക്കുന്നത്. ഓഫീസിലേക്ക് പോകേണ്ട സമയമായിട്ടും അത് വകവെക്കാതെ സഹായത്തിനെത്തിയ യുവാവിന്റെ മനുഷ്യത്വത്തെ പലരും അഭിനന്ദിച്ചു. സമാനമായ രീതിയിൽ തങ്ങൾക്കും ആംബുലൻസിൽ യാത്ര ചെയ്യുമ്പോൾ സഹായം ലഭിച്ചിട്ടുണ്ടെന്ന് പലരും കമന്റുകളിൽ പങ്കുവെച്ചു. ഇത്തരം ചെറിയ വലിയ കാര്യങ്ങളാണ് ലോകത്തെ മനോഹരമാക്കുന്നതെന്ന് സോഷ്യൽ മീഡിയ ഉപയോക്താക്കൾ പ്രതികരിച്ചു.
View this post on Instagram
