വാഷിംഗ്ടൺ: ട്രംപ് അമേരിക്കയുടെ 47-മാത് പ്രസിഡന്റായി അധികാരമേറ്റതിനു പിന്നാലെ ഇന്ത്യ, യു.എസിന്റെ ഉറ്റപങ്കാളിയെന്ന് അടിവരയിട്ട് ട്രംപ് ഭരണകൂടം(Modi-Trump Discussion). ഇതിലൂടെ ചൈനയ്ക്കുള്ള വ്യക്തമായ സന്ദേശം നൽകുകയായിരുന്നു ട്രംപിൻറെ ലക്‌ഷ്യം. സ്ഥാനാരോഹണ ചടങ്ങിന് ശേഷം യു.എസ് സ്റ്റേറ്റ് സെക്രട്ടറി മാർകോ റുബിയോയും ദേശീയ സുരക്ഷാ ഉപദേഷ്ടാവ് മൈക്ക് വാൽസും ആദ്യ ഉഭയകക്ഷി കൂടിക്കാഴ്ചകൾ നടത്തിയത് ഇന്ത്യയെ പ്രതിനിധീകരിച്ചെത്തിയ വിദേശകാര്യ മന്ത്രി എസ്. ജയശങ്കറുമായിട്ടായിരുന്നു.
മാത്രമല്ല; മോദി – ട്രംപ് ചർച്ച ഇന്ത്യയെ സംബന്ധിച്ചിടത്തോളം വലിയ വഴിത്തിരിവാകുമെന്നും വിലയിരുത്തലുണ്ട്. അടുത്ത മാസം വാഷിംഗ്ടണിൽ വച്ച് നരേന്ദ്രമോദി- ട്രംപ് കൂടിക്കാഴ്ച നടന്നേക്കുമെന്നാണ് വിവരം. ചർച്ച നടന്നാൽ വ്യാപാരം, ഇന്ത്യൻ പൗരന്മാരുടെ തൊഴിൽ, വിസ എന്നിവ പ്രധാന വിഷയമായേക്കുമെന്നും ഇന്ത്യ-അമേരിക്ക ബന്ധം കൂടുതൽ ദൃഢമാകുമെന്നും റിപ്പോർട്ടുകളുണ്ട്. മോദിയും ട്രംപും 2019 ൽ ഹൂസ്റ്റണിൽ പങ്കെടുത്ത 'ഹൗഡി മോദി' പരിപാടിയും തൊട്ടടുത്ത വർഷം ഫെബ്രുവരിയിൽ ട്രംപിന്റെ ഇന്ത്യാ സന്ദർശനവും ഇന്ത്യയെ സംബന്ധിച്ചിടത്തോളം വഴിത്തിരിവായിരുന്നു.