ഗുജറാത്ത്: ആയിരക്കണക്കിന് വർഷങ്ങളായി ഇന്ത്യയുടെ അവിഭാജ്യ ഘടകമാണ് ഗോത്ര സമൂഹമെന്നും സ്വാതന്ത്ര്യ പ്രസ്ഥാനത്തിൽ ഗോത്ര സമൂഹത്തിന്റെ സംഭാവനകൾ രാജ്യത്തിന് മറക്കാൻ കഴിയില്ലെന്നും പ്രധാനമന്ത്രി നരേന്ദ്ര മോദി പറഞ്ഞു. ബിർസ മുണ്ടയുടെ ജന്മദിനതോടനുബന്ധിച്ച് നടന്ന 'ജൻജാതിയ ഗൗരവ് ദിവസ്' സമ്മേളനത്തിലാണ് മോദി ഇതിനെ പറ്റി സംസാരിച്ചത്. (Modi)
തുടർന്ന്, കോൺഗ്രസ് സർക്കാരുകളുടെ ഭരണകാലത്ത് ആദിവാസി സമൂഹത്തെ അവഗണിച്ചുവെന്ന് അദ്ദേഹം ആരോപിച്ചു.
"ആറു പതിറ്റാണ്ടുകളായി, കോൺഗ്രസ് സർക്കാരുകൾ ആദിവാസി സമൂഹങ്ങളെ അവഗണിക്കുകയായിരുന്നു. പോഷകാഹാരക്കുറവ് തുടർന്നു, വിദ്യാഭ്യാസം വിരളമായിരുന്നു, ഈ പോരായ്മകൾ പല ആദിവാസി മേഖലകളുടേയും ദൗർഭാഗ്യമായി. കോൺഗ്രസ് സർക്കാരുകൾ നിസ്സംഗത പാലിച്ചു. ബിജെപിയെ സംബന്ധിച്ചിടത്തോളം, ആദിവാസി ക്ഷേമം എപ്പോഴും ഒരു മുൻഗണനയാണ്. നമ്മുടെ ആദിവാസി സഹോദരീ സഹോദരന്മാർ നേരിടുന്ന അനീതി അവസാനിപ്പിക്കാനുള്ള ഉറച്ച തീരുമാനത്തോടെയാണ് ഞങ്ങൾ മുന്നോട്ട് പോയത്," എന്ന് അദ്ദേഹം സമ്മേളനത്തിൽ പറഞ്ഞു.
ആദിവാസി സമൂഹത്തെ ശാക്തീകരിക്കുന്നതിനായി തന്റെ സർക്കാർ നിരവധി നടപടികൾ ആസൂത്രണം ചെയ്തിട്ടുണ്ടെന്ന് പ്രധാനമന്ത്രി മോദി പറഞ്ഞു.