ന്യൂഡൽഹി: വ്യാപാരം സംബന്ധിച്ച് ഇന്ത്യൻ പ്രധാനമന്ത്രി നരേന്ദ്ര മോദിയുമായി ചർച്ച നടത്തിയതായി യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചു. ചൊവ്വാഴ്ച മോദിയുമായി ഫോണിൽ സംസാരിച്ചെന്നും ചർച്ചയുടെ കൂടുതൽ സമയവും വ്യാപാരത്തെക്കുറിച്ചാണ് സംസാരിച്ചതെന്നും ട്രംപ് വ്യക്തമാക്കി. റഷ്യയിൽ നിന്ന് എണ്ണ വാങ്ങുന്നത് ഇന്ത്യ പരിമിതപ്പെടുത്തുമെന്ന് മോദി ഉറപ്പുനൽകിയെന്നും ട്രംപ് കൂട്ടിച്ചേർത്തു.('Modi is a 'great friend', Trump celebrates Diwali at the White House)
"റഷ്യയിൽ നിന്ന് ഇന്ത്യ കൂടുതൽ എണ്ണ വാങ്ങില്ല. റഷ്യ – യുക്രെയ്‌ൻ യുദ്ധം അവസാനിക്കണമെന്ന് എന്നെപ്പോലെ തന്നെ അദ്ദേഹവും ആഗ്രഹിക്കുന്നു," ട്രംപ് പറഞ്ഞു.
റഷ്യയിൽ നിന്ന് എണ്ണ വാങ്ങില്ലെന്ന് നരേന്ദ്ര മോദി ഉറപ്പുനൽകിയത് വലിയൊരു ചുവടുവയ്പ്പാണെന്നും ഇനി ചൈനയെയും ഇത് ചെയ്യാൻ പ്രേരിപ്പിക്കുമെന്നും ട്രംപ് കഴിഞ്ഞ ആഴ്ചയും പറഞ്ഞിരുന്നു. എണ്ണ ഇറക്കുമതി ഉടനടി നിർത്താൻ ഇന്ത്യക്ക് കഴിയില്ലെന്നും ഇതിന് ചെറിയ പ്രക്രിയയുണ്ടെന്നും എന്നാൽ ആ പ്രക്രിയ ഉടൻ അവസാനിക്കുമെന്നും ട്രംപ് വിശദീകരിച്ചു.
എന്നാൽ, ഊർജ വിഷയത്തിൽ ഇന്ത്യൻ ഉപഭോക്താക്കളുടെ താൽപര്യങ്ങൾ സംരക്ഷിക്കുന്നതിനാണ് മുൻഗണനയെന്ന് കേന്ദ്രസർക്കാർ പ്രതികരിച്ചു. "എണ്ണയുടെയും പ്രകൃതിവാതകത്തിന്റെയും പ്രധാന ഇറക്കുമതി രാജ്യമാണ് ഇന്ത്യ. ഊർജം ആവശ്യമായ സാഹചര്യത്തിൽ, ഇന്ത്യക്കാരുടെ താൽപര്യങ്ങൾ സംരക്ഷിക്കുന്നതിനാണ് മുൻഗണന. രാജ്യത്തിൻ്റെ ഇറക്കുമതി നയങ്ങൾ പൂർണമായും ഈ ലക്ഷ്യത്തെ അടിസ്ഥാനമാക്കിയുള്ളതാണ്," വിദേശകാര്യ മന്ത്രാലയത്തിൻ്റെ ഔദ്യോഗിക വക്താവ് രൺധീർ ജയ്‌സ്വാൾ പ്രസ്താവനയിൽ വ്യക്തമാക്കി.
അതേസമയം, യുഎസ് പ്രസിഡൻ്റ് ഡൊണാൾഡ് ട്രംപ് വൈറ്റ് ഹൗസിൽ ദീപാവലി ആഘോഷിച്ചു. ദീപം തെളിയിച്ചുകൊണ്ടാണ് ട്രംപ് ഔദ്യോഗികമായി ആഘോഷങ്ങൾക്ക് തുടക്കം കുറിച്ചത്.
തുടർന്ന് നടത്തിയ പ്രസംഗത്തിൽ ട്രംപ് ഇന്ത്യൻ പ്രധാനമന്ത്രി നരേന്ദ്ര മോദിയെ 'ഗ്രേറ്റ് ഫ്രണ്ട്' (മികച്ച സുഹൃത്ത്) എന്ന് വിശേഷിപ്പിച്ചു. ഇന്ത്യയിലെ ജനങ്ങൾക്കും യുഎസിലുള്ള ഇന്ത്യക്കാർക്കും അദ്ദേഹം ദീപാവലി ആശംസകൾ നേർന്നു. വ്യാപാരത്തിലും പ്രാദേശിക സമാധാന പദ്ധതികളിലുമുള്ള യുഎസ്-ഇന്ത്യ ബന്ധത്തെക്കുറിച്ചും ട്രംപ് തൻ്റെ പ്രസംഗത്തിൽ എടുത്തുപറഞ്ഞു.
"ഇന്ത്യയിലെ ജനങ്ങൾക്ക് എൻ്റെ ഹൃദയം നിറഞ്ഞ ആശംസകൾ നേരുന്നു. ഇന്ന് ഞാൻ നിങ്ങളുടെ പ്രധാനമന്ത്രിയുമായി സംസാരിച്ചു. നല്ലൊരു സംഭാഷണം നടത്തി. ഞങ്ങൾ വ്യാപാരത്തെക്കുറിച്ച് സംസാരിച്ചു. അദ്ദേഹത്തിന് അതിൽ വളരെ താൽപര്യമുണ്ട്. പാക്കിസ്ഥാനുമായി യുദ്ധങ്ങൾ വേണ്ടെന്ന് നമ്മൾ കുറച്ചു മുമ്പ് സംസാരിച്ചിരുന്നെങ്കിലും വ്യാപാരം ഉൾപ്പെട്ടിരുന്നതിനാൽ, എനിക്ക് അതിനെക്കുറിച്ച് സംസാരിക്കാൻ കഴിഞ്ഞു. പാക്കിസ്ഥാനുമായും ഇന്ത്യയുമായും നമുക്ക് യുദ്ധമില്ല. അത് വളരെ നല്ല കാര്യമാണ്," ട്രംപ് പറഞ്ഞു.
"മോദി ഒരു മികച്ച വ്യക്തിയാണ്. വർഷങ്ങളായി അദ്ദേഹം എൻ്റെ ഒരു മികച്ച സുഹൃത്തായി തുടരുകയാണ്. ഇരുട്ടിനുമേൽ പ്രകാശത്തിൻ്റെ വിജയമാണ് ദീപാവലി. അതിൻ്റെ പ്രതീകമായാണ് ദീപം കൊളുത്തുന്നത്. അത് അജ്ഞതയ്ക്കുമേൽ അറിവിൻ്റെയും തിന്മയ്ക്കുമേൽ നന്മയുടെയും വിജയമാണ്," ട്രംപ് കൂട്ടിച്ചേർത്തു.
എഫ്.ബി.ഐ. ഡയറക്ടർ കാഷ് പട്ടേൽ, ഒ.ഡി.എൻ.ഐ. ഡയറക്ടർ തുളസി ഗബ്ബാർഡ്, വൈറ്റ് ഹൗസ് ഡപ്യൂട്ടി പ്രസ് സെക്രട്ടറി കുഷ് ദേശായി, യുഎസിലെ ഇന്ത്യൻ അംബാസഡർ വിനയ് മോഹൻ ക്വാത്ര, ഇന്ത്യയിലെ യുഎസ് അംബാസഡർ സെർജിയോ ഗോർ എന്നിവരുൾപ്പെടെ ഒട്ടേറെ മുതിർന്ന ഉദ്യോഗസ്ഥർ വൈറ്റ് ഹൗസ് ദീപാവലി ആഘോഷത്തിൽ പങ്കെടുത്തു.