മിർസാപൂർ: ഉത്തർപ്രദേശിലെ മിർസാപൂർ ജില്ലയിലെ കച്ച്വായിലെ സെംരി ഗ്രാമത്തിൽ മാനസിക വെല്ലുവിളി നേരിട്ട യുവതി രണ്ട് മക്കളെ കൊലപ്പെടുത്തിയ ശേഷം ആത്മഹത്യ ചെയ്തു. ഇന്നലെ (ശനിയാഴ്ച) വൈകുന്നേരമാണ് നാടിനെ നടുക്കിയ ഈ ദാരുണ സംഭവം നടന്നത്.
35 വയസ്സ് പ്രായമുള്ള സംഗീതയാണ് മക്കളെ കൊലപ്പെടുത്തിയ ശേഷം ആത്മഹത്യ ചെയ്തത്. ഇവരുടെ മക്കളായ ശിവൻഷ് (നാല് വയസ്സ്), ശുഭങ്കർ (14 മാസം) എന്നിവരാണ് കൊല്ലപ്പെട്ടത്.സംഗീത മക്കളുടെ വായിൽ തുണി തിരുകിക്കയറ്റിയ ശേഷം കഴുത്ത് ഞെരിച്ച് കൊലപ്പെടുത്തിയതായി കച്ച്വ സ്റ്റേഷൻ ഹൗസ് ഓഫീസർ (എസ്.എച്ച്.ഒ.) അമർജീത് സിങ് പറഞ്ഞു. തുടർന്ന് അവർ വീട്ടിലെ മേൽക്കൂരയിൽ കയറിൽ തൂങ്ങി ആത്മഹത്യ ചെയ്യുകയായിരുന്നു.
സംഭവം നടക്കുമ്പോൾ സംഗീതയുടെ ഭർത്താവ് ഹരിശ്ചന്ദ്ര വീട്ടിൽ ഉണ്ടായിരുന്നില്ല. ശനിയാഴ്ച രാവിലെയാണ് സംഗീത തൻ്റെ വീട്ടിൽ നിന്നും ഭർതൃവീട്ടിലേക്ക് മടങ്ങിയെത്തിയത്.പോലീസ് വിവരം അറിയിച്ചതിനെത്തുടർന്ന് ഭർത്താവ് ഹരിശ്ചന്ദ്ര വീട്ടിലേക്ക് തിരിച്ചെത്തി. മൃതദേഹങ്ങൾ പോസ്റ്റ്‌മോർട്ടം നടപടികൾക്കായി ആശുപത്രിയിലേക്ക് അയച്ചതായി സർക്കിൾ ഇൻസ്‌പെക്ടർ അമർ ബഹാദൂർ അറിയിച്ചു. കേസിൽ അന്വേഷണം പുരോഗമിക്കുകയാണ്.