ഷില്ലോങ്: മേഘാലയയിലെ ഖാസി ഹിൽസ് മേഖലയിലുള്ള കൽക്കരി ഖനിയിലുണ്ടായ ശക്തമായ സ്ഫോടനത്തിൽ 10 തൊഴിലാളികൾ കൊല്ലപ്പെട്ടു (Meghalaya coal mine blast). വ്യാഴാഴ്ച ഉച്ചയോടെയാണ് അപകടമുണ്ടായത്. ഖനിക്കുള്ളിൽ ജോലി ചെയ്തുകൊണ്ടിരുന്ന തൊഴിലാളികളാണ് അപകടത്തിൽപ്പെട്ടത്. മരിച്ചവരിൽ ഭൂരിഭാഗം പേരും അയൽസംസ്ഥാനമായ അസമിൽ നിന്നുള്ളവരാണെന്നാണ് പ്രാഥമിക വിവരം.
തഷ്ഖായ് (Tashkhai) മേഖലയിലെ ഒരു കൽക്കരി ഖനിയിലാണ് സ്ഫോടനം നടന്നത്. സ്ഫോടനത്തെത്തുടർന്ന് ഖനിയുടെ ഒരു ഭാഗം തകരുകയും തൊഴിലാളികൾ ഉള്ളിൽ കുടുങ്ങുകയുമായിരുന്നു. സംഭവസ്ഥലത്ത് നിന്ന് കറുത്ത പുക ഉയരുന്നത് ദൂരസ്ഥലങ്ങളിൽ നിന്ന് പോലും ദൃശ്യമായിരുന്നു. സ്ഫോടനത്തിന് പിന്നാലെ പരിഭ്രാന്തരായ ഗ്രാമവാസികളും സ്ത്രീകളും കുട്ടികളും സംഭവസ്ഥലത്തേക്ക് തടിച്ചുകൂടി.
അപകടവിവരം അറിഞ്ഞ ഉടൻ തന്നെ മേഘാലയ പോലീസ് സ്ഥലത്തെത്തി രക്ഷാപ്രവർത്തനം ആരംഭിച്ചു. രക്ഷാസേനയുടെ പ്രത്യേക സംഘങ്ങൾ സ്ഥലത്ത് ക്യാമ്പ് ചെയ്യുന്നുണ്ട്. മരിച്ചവരിൽ ഒരാൾ അസമിലെ കടിഗോറയിലുള്ള ബിഹാര സ്വദേശിയാണെന്ന് തിരിച്ചറിഞ്ഞിട്ടുണ്ട്. ബാക്കിയുള്ളവരെ തിരിച്ചറിയാനുള്ള ശ്രമങ്ങൾ തുടരുകയാണ്.
മേഖലയിലെ അനധികൃത ഖനനമാണോ അപകടത്തിന് കാരണമായതെന്ന് പോലീസ് പരിശോധിക്കുന്നുണ്ട്. രക്ഷാപ്രവർത്തനം ഇപ്പോഴും തുടരുകയാണ്. മരണസംഖ്യ ഇനിയും ഉയരാൻ സാധ്യതയുണ്ടെന്നാണ് ലഭിക്കുന്ന സൂചനകൾ. പരിക്കേറ്റവരെ അടുത്തുള്ള ആശുപത്രികളിലേക്ക് മാറ്റിയിട്ടുണ്ട്. കൂടുതൽ വിവരങ്ങൾ ലഭ്യമായി വരുന്നതേയുള്ളൂ.
