ലഖ്നൗ: മെഡിക്കൽ വിദ്യാഭ്യാസം വിദ്യാർത്ഥികളുടെ ജന്മാവകാശമല്ലെന്നും അതൊരു വലിയ പദവിയാണെന്നും കേന്ദ്ര ആരോഗ്യമന്ത്രി ജെ.പി. നദ്ദ. ഓരോ മെഡിക്കൽ വിദ്യാർത്ഥിക്ക് വേണ്ടിയും സർക്കാർ പ്രതിവർഷം ലക്ഷക്കണക്കിന് രൂപ ചെലവഴിക്കുന്നുണ്ടെന്നും അതിനാൽ അവർക്ക് രാജ്യത്തോടും സമൂഹത്തോടും വലിയ ഉത്തരവാദിത്തമുണ്ടെന്നും അദ്ദേഹം ഓർമ്മിപ്പിച്ചു. ലഖ്നൗവിലെ കിങ് ജോർജ് മെഡിക്കൽ സർവകലാശാലയുടെ21-ാമത് ബിരുദദാന ചടങ്ങിൽ സംസാരിക്കുകയായിരുന്നു മന്ത്രി.(Medical education is not a birthright, it is a privilege, says JP Nadda)
ഒരു മെഡിക്കൽ വിദ്യാർത്ഥിക്കായി സർക്കാർ വർഷം തോറും 30 മുതൽ 35 ലക്ഷം രൂപ വരെയാണ് ചെലവിടുന്നത്. സ്കൂൾ-കോളേജ് വിദ്യാഭ്യാസം പോലെ ജന്മാവകാശമായി ഇതിനെ കാണരുത്. ലഭിച്ച ഈ വലിയ അവസരത്തിന് സമൂഹത്തോട് കടപ്പെട്ടിരിക്കണം.
മെഡിക്കൽ മേഖലയിൽ രാജ്യം വലിയ പുരോഗതി കൈവരിച്ചു കഴിഞ്ഞു. സൗകര്യങ്ങളില്ലെന്ന് പറഞ്ഞ് ആരും ഇനി പരാതിപ്പെടരുത്. ആർക്കും വിദേശത്ത് പോകാൻ സ്വാതന്ത്ര്യമുണ്ട്, എന്നാൽ രാജ്യത്ത് സൗകര്യങ്ങളില്ലെന്ന കാരണം അതിനായി പറയരുത്. കഴിഞ്ഞ 11 വർഷത്തിനിടെ രാജ്യത്തെ മെഡിക്കൽ കോളേജുകളുടെ എണ്ണം 387-ൽ നിന്ന് 819 ആയി ഉയർന്നു. എംബിബിഎസ് സീറ്റുകൾ 51,000-ൽ നിന്ന് 1,10,000 കടന്നു. പിജി സീറ്റുകൾ 31,000-ൽ നിന്ന് 80,000 ആയി വർധിച്ചു.
ഒരൊറ്റ 'എയിംസ്' (AIIMS) ഉണ്ടായിരുന്ന സ്ഥാനത്ത് ഇന്ന് രാജ്യത്ത് 23 എയിംസുകൾ പ്രവർത്തിക്കുന്നുണ്ട്. ഈ അധ്യയന വർഷം 7,500 പുതിയ പിജി സീറ്റുകൾ കൂടി അനുവദിക്കുമെന്നും മന്ത്രി അറിയിച്ചു.
വിവിധ മേഖലകളിൽ മികച്ച നേട്ടം കൈവരിച്ച 81 വിദ്യാർത്ഥികൾക്കും ഒരു ഫാക്കൽറ്റി അംഗത്തിനും ചടങ്ങിൽ ഗോൾഡ് മെഡലുകളും മെറിറ്റ് സർട്ടിഫിക്കറ്റുകളും വിതരണം ചെയ്തു. എംബിബിഎസ്, ബിഡിഎസ്, നഴ്സിംഗ് തുടങ്ങി വിവിധ വിഭാഗങ്ങളിലെ ഗവേഷണ-ക്ലിനിക്കൽ മികവിനാണ് പുരസ്കാരങ്ങൾ നൽകിയത്.