കൊൽക്കത്ത: എസ്ര സ്ട്രീറ്റിൽ ഇന്ന് പുലർച്ചെയുണ്ടായ വൻ തീപിടിത്തത്തിൽ മുന്നൂറോളം കടകൾ കത്തിനശിച്ചു. സംഭവസ്ഥലത്തെ സമീപത്തെ കെട്ടിടങ്ങളിൽ താമസിച്ചിരുന്ന മുഴുവൻ ആളുകളെയും സുരക്ഷിതമായി ഒഴിപ്പിച്ചു. തീയണയ്ക്കുന്നതിനായി 20-ഓളം ഫയർ എഞ്ചിനുകൾ സ്ഥലത്തെത്തി മണിക്കൂറുകളോളം പരിശ്രമിച്ചു.(Massive fire breaks out on Kolkata, Around 300 shops destroyed )
കൊൽക്കത്ത സെൻട്രൽ ഡെപ്യൂട്ടി പോലീസ് കമ്മീഷണർ ഇന്ദിരാ മുഖർജി പ്രതികരിച്ചതനുസരിച്ച്, ഇതുവരെ ആളപായമൊന്നും റിപ്പോർട്ട് ചെയ്തിട്ടില്ല. ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പോലീസിൻ്റെ പ്രാഥമിക നിഗമനം. എസ്ര സ്ട്രീറ്റിലെ ഇടുങ്ങിയ പാതയോരത്ത് അടുത്തടുത്തായി സ്ഥിതി ചെയ്യുന്ന കടകളിലാണ് അപകടം ഉണ്ടായത്. ഇന്ന് പുലർച്ചെ ഒരു കടയിൽ നിന്ന് തീ ആളിപ്പടരുകയായിരുന്നു.
കടകൾക്കുള്ളിൽ ധാരാളം കത്തുന്ന വസ്തുക്കൾ സൂക്ഷിച്ചിരുന്നതാണ് തീ അതിവേഗം പടരാൻ കാരണമായതെന്ന് പോലീസ് പറയുന്നു. ആദ്യം ആറ് ഫയർ എഞ്ചിനുകളാണ് തീയണയ്ക്കാൻ ശ്രമിച്ചതെങ്കിലും തീ വ്യാപിച്ചതോടെ കൂടുതൽ യൂണിറ്റുകൾ എത്തിക്കുകയായിരുന്നു. ഫയർ എഞ്ചിനുകൾക്ക് സുഗമമായി സഞ്ചരിക്കാൻ പ്രദേശത്തെ റോഡുകൾ ഒഴിപ്പിച്ചു.സംഭവത്തിൽ വിശദമായ അന്വേഷണം നടത്തുമെന്ന് ഫയർ ആൻഡ് എമർജൻസി സർവീസസ് ഉദ്യോഗസ്ഥൻ വ്യക്തമാക്കി.