ജയ്പൂർ: രാജസ്ഥാനിലെ അൽവാർ ജില്ലയിലുള്ള ഭിവാഡിയിൽ കെമിക്കൽ ഫാക്ടറിയിലുണ്ടായ വൻ തീപിടുത്തത്തിൽ ഏഴ് തൊഴിലാളികൾ വെന്തുമരിച്ചു. ഫാക്ടറിക്കുള്ളിൽ ഇനിയും പത്തോളം തൊഴിലാളികൾ കുടുങ്ങിക്കിടക്കുന്നതായാണ് റിപ്പോർട്ടുകൾ. പരിക്കേറ്റ പലരുടെയും നില അതീവ ഗുരുതരമായി തുടരുകയാണ്.(Massive fire breaks out at chemical factory in Bhiwadi, 7 workers burnt to death)
തിങ്കളാഴ്ച രാവിലെ ഒൻപതരയോടെയാണ് ഭിവാഡിയിലെ വ്യവസായ മേഖലയിലുള്ള ഫാക്ടറിയിൽ തീപിടുത്തമുണ്ടായത്. അപകടസമയത്ത് ഏകദേശം 25 തൊഴിലാളികൾ ഫാക്ടറിക്കുള്ളിൽ ജോലി ചെയ്യുന്നുണ്ടായിരുന്നു. കെമിക്കലുകൾ ഉള്ളതിനാൽ തീ അതിവേഗം പടരുകയും ഫാക്ടറിയുടെ ഭൂരിഭാഗവും കത്തിയമരുകയും ചെയ്തു.
പ്രദേശത്ത് പട്രോളിംഗ് നടത്തുകയായിരുന്ന പോലീസ് സംഘമാണ് ഫാക്ടറിയിൽ നിന്ന് പുക ഉയരുന്നത് ആദ്യം കണ്ടത്. തുടർന്ന് ഫയർഫോഴ്സും മെഡിക്കൽ സംഘവും സ്ഥലത്തെത്തി. ഒന്നര മണിക്കൂർ നീണ്ട കഠിന പരിശ്രമത്തിനൊടുവിലാണ് തീ നിയന്ത്രണവിധേയമാക്കിയത്. അഡീഷണൽ ഡിസ്ട്രിക്റ്റ് മജിസ്ട്രേറ്റ് സുമിത മിശ്ര, കളക്ടർ തുടങ്ങിയ മുതിർന്ന ഉദ്യോഗസ്ഥർ സംഭവസ്ഥലം സന്ദർശിച്ച് സ്ഥിതിഗതികൾ വിലയിരുത്തി. സംഭവത്തിൽ ജില്ലാ ഭരണകൂടം മജിസ്ട്രീരിയൽ അന്വേഷണം പ്രഖ്യാപിച്ചു.
