ന്യൂഡൽഹി : പ്രധാനമന്ത്രി നരേന്ദ്ര മോദി, മൻ കി ബാത്തിൻ്റെ 119-ാം എപ്പിസോഡിൽ, സ്ത്രീശാക്തീകരണത്തെക്കുറിച്ചും ബഹിരാകാശ, ശാസ്ത്ര മേഖലകളിലെ അവരുടെ സംഭാവനകളെക്കുറിച്ചും സംസാരിച്ചു. ഈ വർഷത്തെ വനിതാ ദിനത്തിന് ഒരു പ്രത്യേക സംരംഭം അദ്ദേഹം പ്രഖ്യാപിച്ചു.(Mann ki Baat)
ഇന്ത്യൻ സ്‌പേസ് റിസർച്ച് ഓർഗനൈസേഷൻ്റെ (ഐഎസ്ആർഒ) നൂറാമത് റോക്കറ്റ് വിക്ഷേപണത്തിന് രാജ്യം സാക്ഷ്യം വഹിച്ചതെങ്ങനെയെന്ന് പ്രധാനമന്ത്രി ചൂണ്ടിക്കാട്ടി. ഇത് ഒരു സംഖ്യ മാത്രമല്ല, “ബഹിരാകാശത്തിൽ പുതിയ ഉയരങ്ങൾ തൊടാൻ രാജ്യത്തിൻ്റെ ദൃഢനിശ്ചയം” കൂടിയാണെന്ന് അദ്ദേഹം വിശേഷിപ്പിച്ചു. നമ്മുടെ ബഹിരാകാശ ശാസ്ത്രജ്ഞരുടെ സംഘത്തിൽ "സ്ത്രീ ശക്തി"യുടെ വർദ്ധിച്ചുവരുന്ന പങ്കാളിത്തമാണ് പ്രധാനമന്ത്രി മോദി ഉയർത്തിക്കാട്ടിയ ഒരു പ്രധാന ഘടകം.
ഐഎസ്ആർഒയുടെ വിജയങ്ങളുടെ വ്യാപ്തി വളരെ വലുതാണെന്നും കഴിഞ്ഞ 10 വർഷത്തിനുള്ളിൽ മാത്രം 460 ഓളം ഉപഗ്രഹങ്ങൾ വിക്ഷേപിച്ചിട്ടുണ്ടെന്നും അദ്ദേഹം കൂട്ടിച്ചേർത്തു. ഇന്ത്യയുടെ സ്വാതന്ത്ര്യസമരത്തിലും ഭരണഘടനാ നിർമ്മാണത്തിലും രാജ്യത്തിൻ്റെ മാതൃശക്തി പ്രധാന പങ്കുവഹിച്ചിട്ടുണ്ടെന്നും ഇന്ത്യൻ സംസ്‌കാരത്തിൽ പെൺമക്കൾക്കുള്ള ബഹുമാനത്തെക്കുറിച്ചും പ്രധാനമന്ത്രി വ്യക്തമാക്കി.
ഇത്തവണ വനിതാ ദിനത്തിൽ നമ്മുടെ സ്ത്രീ ശക്തിക്കായി താൻ ഒരു കാര്യം ചെയ്യാൻ,പോകുന്നുവെന്നും, ഈ പ്രത്യേക അവസരത്തിൽ, തൻ്റെ സോഷ്യൽ മീഡിയ അക്കൗണ്ടുകൾ( എക്സ്, ഇൻസ്റ്റാഗ്രാം തുടങ്ങിയവ) രാജ്യത്തെ ചില പ്രചോദകരായ സ്ത്രീകൾക്ക് ഒരു ദിവസത്തേക്ക് കൈമാറാൻ പോകുന്നുവെന്നും പ്രധാനമന്ത്രി മോദി തൻ്റെ പ്രതിമാസ റേഡിയോ ഷോയിൽ പറഞ്ഞു. മാർച്ച് 8 ന് തൻ്റെ സോഷ്യൽ മീഡിയ ഹാൻഡിലുകൾ ഏറ്റെടുക്കുന്ന സ്ത്രീകൾ അവരുടെ ജോലിയും അനുഭവങ്ങളും രാജ്യവുമായി പങ്കിടുമെന്ന് അദ്ദേഹം കൂട്ടിച്ചേർത്തു.