മധുര: ശാസ്ത്രീയമല്ലാത്ത രീതിയിൽ വണ്ണം കുറയ്ക്കാൻ ശ്രമിച്ച പത്തൊമ്പതുകാരി മധുരയിൽ മരണപ്പെട്ടു (Madurai Girl Weight Loss Death). യൂട്യൂബ് വീഡിയോകൾ കണ്ട് വണ്ണം കുറയ്ക്കാനുള്ള പരീക്ഷണങ്ങൾ നടത്തിയതാണ് യുവതിയുടെ ജീവൻ അപഹരിച്ചത്. വണ്ണം കുറയ്ക്കാൻ സഹായിക്കുമെന്ന് വിശ്വസിച്ച് 'ബോറാക്സ്' (വെങ്ങാരം) കലർത്തിയ വെള്ളം കുടിച്ചതാണ് മരണകാരണമെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.
വീഡിയോകളിൽ കണ്ട നിർദ്ദേശങ്ങൾ അനുസരിച്ച് ശരീരഭാരം കുറയ്ക്കാനായി യുവതി ഈ രീതി ദീർഘകാലമായി പിന്തുടർന്നിരുന്നതായാണ് വിവരം. വെങ്ങാരം അകത്തുചെന്നതിനെത്തുടർന്ന് കടുത്ത ആരോഗ്യപ്രശ്നങ്ങൾ അനുഭവപ്പെട്ട യുവതിയെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. വെങ്ങാരം പോലുള്ള രാസവസ്തുക്കൾ ശുചീകരണ പ്രവർത്തനങ്ങൾക്കും വ്യവസായ ആവശ്യങ്ങൾക്കുമാണ് ഉപയോഗിക്കുന്നത്, ഇവ മനുഷ്യശരീരത്തിനുള്ളിൽ ചെന്നാൽ ആന്തരിക അവയവങ്ങൾക്ക് ഗുരുതരമായ നാശമുണ്ടാക്കുകയും മരണത്തിന് കാരണമാവുകയും ചെയ്യും.
യൂട്യൂബ് പോലുള്ള പ്ലാറ്റ്ഫോമുകളിൽ പ്രചരിക്കുന്ന ഇത്തരം അശാസ്ത്രീയമായ ആരോഗ്യ നുറുങ്ങുകൾ പിന്തുടരുന്നത് വലിയ അപകടങ്ങൾക്ക് വഴിവെക്കുമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. ഡോക്ടറുടെയോ അംഗീകൃത ഡയറ്റീഷ്യന്റെയോ നിർദ്ദേശമില്ലാതെ ഇത്തരം പരീക്ഷണങ്ങൾ നടത്തരുതെന്നും സോഷ്യൽ മീഡിയയിലെ വ്യാജ പ്രചാരണങ്ങളിൽ വീഴരുതെന്നും അധികൃതർ പൊതുജനങ്ങളോട് അഭ്യർത്ഥിച്ചു. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.
A 19-year-old girl from Madurai died after following unscientific weight-loss tips from YouTube. She reportedly consumed water mixed with Borax, believing it would help her lose weight, which led to fatal health complications. Health experts have warned against following such dangerous, non-medical advice from social media platforms, emphasizing the lethal risks of ingesting industrial chemicals like Borax.