ചെന്നൈ: മദ്രാസ് ഹൈക്കോടതിയുടെ മധുര ബെഞ്ച് ബിജെപി നേതാവ് അമിത് മാളവ്യക്കെതിരായ ക്രിമിനൽ കേസ് റദ്ദാക്കിക്കൊണ്ട് തമിഴ്നാട് ഉപമുഖ്യമന്ത്രി ഉദയനിധി സ്റ്റാലിനെതിരെ രൂക്ഷവിമർശനം നടത്തിയിരിക്കുകയാണ് ( Madras High Court Amit Malviya Verdict). സനാതന ധർമ്മത്തെക്കുറിച്ചുള്ള ഉദയനിധിയുടെ പരാമർശങ്ങൾ വ്യക്തമായും വിദ്വേഷ പ്രസംഗത്തിന്റെ പരിധിയിൽ വരുന്നതാണെന്ന് കോടതി നിരീക്ഷിച്ചു. 2023-ൽ നടന്ന ഒരു സമ്മേളനത്തിൽ സനാതന ധർമ്മം ഡെങ്കിപ്പനിയും മലേറിയയും പോലെയാണെന്നും അതിനെ നിർമ്മാർജ്ജനം ചെയ്യണമെന്നുമുള്ള ഉദയനിധിയുടെ വാക്കുകൾക്കെതിരെ അമിത് മാളവ്യ സോഷ്യൽ മീഡിയയിൽ പോസ്റ്റിട്ടിരുന്നു. ഇത് 80 ശതമാനം വരുന്ന ജനവിഭാഗത്തെ വംശഹത്യ ചെയ്യാൻ ആഹ്വാനം ചെയ്യുന്നതിന് തുല്യമാണെന്നായിരുന്നു മാളവ്യയുടെ വിമർശനം. ഈ പോസ്റ്റിന്റെ പേരിൽ ഡിഎംകെ നൽകിയ പരാതിയിലാണ് തിരുച്ചിറപ്പള്ളി പോലീസ് കേസെടുത്തിരുന്നത്.
ഈ കേസ് പരിഗണിച്ച ജസ്റ്റിസ് എസ്. ശ്രീമതി, ഒരു മന്ത്രി തന്നെ ഇത്തരം വിദ്വേഷ പ്രസംഗങ്ങൾ നടത്തുമ്പോൾ അതിനെതിരെ പ്രതികരിക്കുന്നത് കുറ്റകരമല്ലെന്ന് വ്യക്തമാക്കി. തമിഴിലെ 'ഒഴിപ്പ്' എന്ന വാക്കിന്റെ അർത്ഥം ഉന്മൂലനം എന്നാണെന്നും സനാതന ധർമ്മം ഇല്ലാതാക്കണമെന്ന് പറയുമ്പോൾ അത് പിന്തുടരുന്നവരും ഇല്ലാതാകണം എന്ന വ്യാഖ്യാനം അതിൽ വരുന്നുണ്ടെന്നും കോടതി ചൂണ്ടിക്കാട്ടി. ഒരു മതവിശ്വാസിയായ അമിത് മാളവ്യ മന്ത്രിയുടെ പ്രസംഗം മൂലം ഇരയാക്കപ്പെട്ട വ്യക്തിയാണെന്നും കോടതി നിരീക്ഷിച്ചു. പ്രകോപനപരമായ പ്രസംഗം നടത്തിയ വ്യക്തിക്കെതിരെ നടപടി എടുക്കാതെ അതിനോട് പ്രതികരിച്ചവർക്കെതിരെ മാത്രം കേസെടുക്കുന്നതിലെ നീതികേടും കോടതി ചോദ്യം ചെയ്തു.
ഹൈക്കോടതിയുടെ ഈ വിധി ഉദയനിധി സ്റ്റാലിനും ഡിഎംകെ സർക്കാരിനും വലിയ തിരിച്ചടിയായാണ് വിലയിരുത്തപ്പെടുന്നത്. 2024 മാർച്ചിൽ മറ്റൊരു കേസിൽ മദ്രാസ് ഹൈക്കോടതി തന്നെ ഉദയനിധിയുടെ വാക്കുകളെ വിദ്വേഷ പ്രസംഗമെന്ന് വിളിച്ചിട്ടുള്ളത് ജസ്റ്റിസ് ശ്രീമതി തന്റെ ഉത്തരവിൽ ഓർമ്മിപ്പിച്ചു. ദ്രാവിഡ കസഗത്തിന്റെയും ഡിഎംകെയുടെയും ഹിന്ദു മതത്തോടുള്ള ദീർഘകാലമായുള്ള എതിർപ്പിന്റെ പശ്ചാത്തലവും കോടതി വിധിയിൽ പരാമർശിച്ചിട്ടുണ്ട്. ലഹളയുണ്ടാക്കാനോ അക്രമത്തിന് പ്രേരിപ്പിക്കാനോ അമിത് മാളവ്യ ശ്രമിച്ചിട്ടില്ലെന്നും തന്റെ അഭിപ്രായം പ്രകടിപ്പിക്കുക മാത്രമാണ് ചെയ്തതെന്നും കോടതി വിധിയിൽ വ്യക്തമാക്കി.
The Madras High Court has quashed the criminal case against BJP leader Amit Malviya, ruling that his response to Udhayanidhi Stalin's Sanatan Dharma comments was not a crime. The court observed that the Tamil Nadu Deputy CM's original speech, comparing Sanatan Dharma to diseases and calling for its "eradication," constituted hate speech. Justice S. Srimathy noted that calling for the abolition of a faith implies eliminating its followers, which can be interpreted as an incitement to genocide, and criticized the lack of action against the minister while targeting those who reacted to his speech.