മുംബൈ: ഭയന്തറിൽ ജനവാസ മേഖലയിൽ പുള്ളിപ്പുലിയിറങ്ങി. ഫ്ലാറ്റ് സമുച്ചയത്തിനുള്ളിൽ കടന്നുകൂടിയ പുലി നടത്തിയ ആക്രമണത്തിൽ നിരവധി പേർക്ക് പരിക്കേറ്റു. ഫ്ലാറ്റിൽ നിന്ന് പുറത്തിറങ്ങി റോഡിലേക്ക് പ്രവേശിച്ച പുലിയെ പിടികൂടാൻ വനംവകുപ്പ് അധികൃതർ തീവ്രശ്രമം തുടരുകയാണ്.(Leopard attacks residential area and flat in Mumbai)
ആക്രമണത്തിനിരയായവരിൽ ആറു ദിവസം കഴിഞ്ഞ് വിവാഹം നടക്കേണ്ട യുവതിയും ഉൾപ്പെടുന്നു. പെൺകുട്ടിയുടെ മുഖത്തടക്കം പുലിയുടെ നഖം പതിഞ്ഞ് ഗുരുതരമായി പരിക്കേറ്റിട്ടുണ്ട്. പരിക്കേറ്റ എല്ലാവരെയും ഉടൻ തന്നെ സമീപത്തെ ആശുപത്രിയിലേക്ക് മാറ്റി വിദഗ്ധ ചികിത്സ ലഭ്യമാക്കി.
പുള്ളിപ്പുലിയെ മയക്കുവെടി വെച്ച് പിടികൂടുന്നതിനായി പ്രത്യേക വനംവകുപ്പ് സംഘം സ്ഥലത്തെത്തിയിട്ടുണ്ട്. പുലി ഇപ്പോഴും പ്രദേശത്ത് തന്നെ ഉള്ളതിനാൽ ഭയന്തർ മേഖലയിലുള്ളവർ പുറത്തിറങ്ങരുതെന്നും വീടുകളുടെ ജനലുകളും വാതിലുകളും അടച്ചിടണമെന്നും പോലീസ് മൈക്കിലൂടെ നിർദ്ദേശം നൽകി.
സഞ്ജയ് ഗാന്ധി നാഷണൽ പാർക്കിനോട് ചേർന്നു കിടക്കുന്ന മേഖലയായതിനാൽ ഇവിടങ്ങളിൽ വന്യമൃഗങ്ങൾ ഇറങ്ങുന്നത് പതിവാണെങ്കിലും, ഫ്ലാറ്റിനുള്ളിൽ കടന്ന് ആളുകളെ ആക്രമിച്ചത് പ്രദേശവാസികളെ വലിയ ഭീതിയിലാഴ്ത്തിയിരിക്കുകയാണ്.