ചെന്നൈ : തമിഴ്‌നാട്ടിലെ ബിജെപിയുടെ വൈസ് പ്രസിഡന്റുമാരിൽ ഒരാളായി നടിയും രാഷ്ട്രീയ നേതാവുമായ ഖുഷ്ബു സുന്ദറിനെ നിയമിച്ചു. നിയമനത്തിൽ താൻ തികച്ചും സന്തോഷവതിയാണെന്നും നന്ദിയുണ്ടെന്നും അവർ പറഞ്ഞു. തന്നിൽ വിശ്വാസമർപ്പിച്ചതിന് മുതിർന്ന പാർട്ടി നേതാക്കൾക്ക് അവർ നന്ദിയറിയിച്ചു.(Khushbu Sundar becomes BJP Tamil Nadu Vice-President)
തന്റെ അടിയന്തര മുൻഗണന മണ്ഡലങ്ങളിലുടനീളം ബൂത്ത് ലെവൽ സാന്നിധ്യം ശക്തിപ്പെടുത്തുക എന്നതായിരിക്കുമെന്ന് പറഞ്ഞ അവർ, ദീർഘകാലമായി വ്യക്തിപരമായ ബന്ധം പുലർത്തുന്ന നടനും തമിഴക വെട്രി കഴകം (ടി.വി.കെ) മേധാവിയുമായ വിജയോട് സഖ്യത്തിലെത്താൻ നേരിട്ട് അഭ്യർത്ഥിച്ചു.
"വിജയ്ക്ക് വളരെ ലളിതമായ ഒരു സന്ദേശമുണ്ട്. അദ്ദേഹത്തെ അറിയാവുന്നതിനാൽ, ഞാൻ എപ്പോഴും എന്റെ ഇളയ സഹോദരനെപ്പോലെയാണ് അദ്ദേഹത്തെ കണ്ടിരുന്നത്. നോക്കൂ, ഡി.എം.കെയെ പരാജയപ്പെടുത്തുക എന്നതാണ് നിങ്ങളുടെ ആശയം, ഡി.എം.കെയെ പരാജയപ്പെടുത്താൻ നിങ്ങൾ ആഗ്രഹിക്കുമ്പോൾ, നാമെല്ലാവരും ഒന്നിക്കണമെന്ന് ഞാൻ കരുതുന്നു. തമിഴ്‌നാട്ടിലെ ഡി.എം.കെയുടെ തെറ്റുകൾ, സർക്കാർ പരാജയം എന്നിവ നിങ്ങൾക്കറിയാം, നിങ്ങൾ അവർക്കെതിരെ വളരെ ശക്തമായി സംസാരിക്കുകയും അവരെ ആക്രമിക്കുകയും ചെയ്യുന്നു. അതിനാൽ ടി.വി.കെ ബിജെപിയുമായും എ.ഐ.എ.ഡി.എം.കെയുമായും കൈകോർക്കുന്നത് വളരെ ബുദ്ധിപരമായ തീരുമാനമാണെന്ന് ഞാൻ കരുതുന്നു." ഖുശ്ബു പറഞ്ഞു.