ഛണ്ഡീഗഢ്: പൊതുജനങ്ങളുടെ സുരക്ഷ മുൻനിർത്തി, നഗരത്തിൽ ആറ് ഇനം നായകളെ വളർത്തുന്നത് നിരോധിച്ചുകൊണ്ട് ഛണ്ഡീഗഢ് മുനിസിപ്പൽ കോർപ്പറേഷൻ ഉത്തരവിറക്കി. ആക്രമണോത്സുകത പ്രകടിപ്പിക്കുന്ന ഇനങ്ങളെയാണ് നിരോധിച്ചിരിക്കുന്നത്.(Keeping of 6 breeds of dogs banned in Chandigarh)
അമേരിക്കൻ ബുൾഡോഗ്, അമേരിക്കൻ പിറ്റ്ബുൾ, ബുൾ ടെറിയർ, കെയ്ൻ കോർസോ, ഡോഗോ അർജന്റീനോ, റോട്ട്‌വീലർ എന്നിവയാണ് ഈ ഇനങ്ങൾ.
ഇതുമായി ബന്ധപ്പെട്ട ചട്ടങ്ങൾ വിജ്ഞാപനമായി കോർപ്പറേഷൻ പുറത്തിറക്കി. പുതിയ നിയന്ത്രണങ്ങൾ കർശനമാണ്. ഈ ആറ് ഇനം നായകളെ ആർക്കും പുതുതായി വാങ്ങാനോ വിൽക്കാനോ അനുമതിയില്ല, ഇവയുടെ പ്രജനനവും പൂർണ്ണമായി വിലക്കി.
എന്നാൽ, നിരോധിച്ച നായകളെ നിലവിൽ വളർത്തിക്കൊണ്ടിരിക്കുന്നവർക്ക് ഈ നിരോധനം ബാധകമാവില്ല. നഗരസഭയിൽ ഇതുവരെ രജിസ്റ്റർ ചെയ്യാത്ത ഉടമസ്ഥർക്ക് അത് ചെയ്യുന്നതിനായി 45 ദിവസത്തെ ഇളവ് അനുവദിച്ചിട്ടുണ്ട്.
നിലവിൽ ഈ നായകളെ കൈവശം വെച്ചിട്ടുള്ളവർക്കായി കോർപ്പറേഷൻ കർശനമായ മാർഗ്ഗനിർദ്ദേശങ്ങൾ പുറത്തിറക്കിയിട്ടുണ്ട്. നായകളുമായി പുറത്തിറങ്ങുന്ന ഉടമകൾ അവയുടെ മുഖം മാസ്‌ക് ഉപയോഗിച്ച് മൂടണം.
സുഖ്‌ന തടാകം, റോസ് ഗാർഡൻ, റോക്ക് ഗാർഡൻ, ലീഷർ വാലി, ശാന്തി കുഞ്ച്, ചണ്ഡീഗഢ് ബൊട്ടാണിക്കൽ ഗാർഡൻ സാരംഗ്പൂർ തുടങ്ങിയ പ്രധാന പൊതുസ്ഥലങ്ങളിലേക്കൊന്നും ഈ നായകളെ കൊണ്ടുപോകരുത്.
നായ്ക്കൾ പൊതുസ്ഥലത്ത് മലമൂത്ര വിസർജ്ജനം നടത്തിയാൽ, ഉടമ വിസർജ്ജ്യം പൂപ്പ് ബാഗിലാക്കി ശരിയായ സംസ്കരണ രീതി ഉപയോഗിച്ച് നീക്കം ചെയ്യണം. ഇത് ലംഘിക്കുന്ന ഉടമയ്ക്ക് പിഴ ചുമത്തും.