ബെംഗളൂരു: കർണാടക സംസ്ഥാന റോഡ് ട്രാൻസ്പോർട്ട് കോർപ്പറേഷനിലെ (KSRTC) വനിതാ ജീവനക്കാർക്ക് മാസത്തിൽ ഒരു ദിവസം ശമ്പളത്തോടുകൂടിയ ആർത്തവാവധി അനുവദിച്ചു. 2026 ജനുവരി ഒന്നുമുതൽ ഈ ഉത്തരവ് പ്രാബല്യത്തിൽ വരുമെന്ന് കെ.എസ്.ആർ.ടി.സി മാനേജിങ് ഡയറക്ടർ അക്രം പാഷ അറിയിച്ചു.
18 വയസ്സിനും 52 വയസ്സിനും ഇടയിൽ പ്രായമുള്ള എല്ലാ വനിതാ ജീവനക്കാർക്കും ഈ അവധിക്ക് അർഹതയുണ്ടാകും.
രേഖകൾ വേണ്ട: ആർത്തവാവധി ലഭിക്കുന്നതിനായി പ്രത്യേക മെഡിക്കൽ സർട്ടിഫിക്കറ്റുകളോ രേഖകളോ ഹാജരാക്കേണ്ടതില്ല.
ആർത്തവാവധി മറ്റ് അവധികളുമായി (Clubs with other leaves) ചേർത്ത് എടുക്കാൻ അനുവാദമില്ല. കൂടാതെ, ഒരു മാസത്തെ അവധി ഉപയോഗിച്ചില്ലെങ്കിൽ അത് അടുത്ത മാസത്തേക്ക് മാറ്റിവെക്കാനും (Carry forward) സാധിക്കില്ല.
കർണാടക സർക്കാർ അടുത്തിടെ നടപ്പാക്കിയ ആർത്തവാവധി നയത്തിന്റെ (Menstrual Leave Policy) ഭാഗമായാണ് ഈ നടപടി. നവംബർ 12-ന് പുറത്തിറക്കിയ വിജ്ഞാപന പ്രകാരം സർക്കാർ-സ്വകാര്യ മേഖലകളിലെ എല്ലാ സ്ഥാപനങ്ങളും ജീവനക്കാരികൾക്ക് ഈ അവധി നൽകാൻ ബാധ്യസ്ഥരാണ്. ഹോട്ടലുകളും വ്യാപാര സ്ഥാപനങ്ങളും ഇതിന്റെ പരിധിയിൽ വരും.
അതേസമയം, ഈ നയത്തിനെതിരെ ബെംഗളൂരു ഹോട്ടൽ അസോസിയേഷനും ചില സ്വകാര്യ സ്ഥാപനങ്ങളും നൽകിയ ഹർജികൾ നിലവിൽ ഹൈക്കോടതിയുടെ പരിഗണനയിലാണെന്നതും ശ്രദ്ധേയമാണ്.