ബംഗളൂരു: ബംഗളൂരു യെലഹങ്കയിലെ കൊഗിലു ലേഔട്ടിൽ നിന്ന് കുടിയൊഴിപ്പിക്കപ്പെട്ട കുടുംബങ്ങളുടെ പുനരധിവാസം ചർച്ച ചെയ്യുന്നതിനായി കർണാടക മുഖ്യമന്ത്രി സിദ്ധരാമയ്യ അടിയന്തര യോഗം വിളിച്ചു. തിങ്കളാഴ്ച വൈകുന്നേരം നാലിന് മുഖ്യമന്ത്രിയുടെ അധ്യക്ഷതയിൽ ചേരുന്ന യോഗത്തിൽ ഉപമുഖ്യമന്ത്രി ഡി.കെ. ശിവകുമാർ, ഭവന നിർമ്മാണ മന്ത്രി സമീർ അഹമ്മദ് ഖാൻ തുടങ്ങിയവർ പങ്കെടുക്കും.
എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ മുഖ്യമന്ത്രിയുമായും ഉപമുഖ്യമന്ത്രിയുമായും സംസാരിച്ചതിനെത്തുടർന്നാണ് സർക്കാർ നടപടികൾ വേഗത്തിലാക്കിയത്. കുടിയൊഴിപ്പിക്കൽ നടപടികളിൽ പാർട്ടി കേന്ദ്ര നേതൃത്വം കടുത്ത ആശങ്ക പ്രകടിപ്പിച്ചിരുന്നു.
ഡിസംബർ 20-ന് പുലർച്ചെയാണ് യെലഹങ്കയിലെ വസീം ലേഔട്ട്, ഫഖീർ കോളനി എന്നിവിടങ്ങളിലെ മുന്നൂറോളം വീടുകൾ ബംഗളൂരു സോളിഡ് വേസ്റ്റ് മാനേജ്മെന്റ് ലിമിറ്റഡ് (BSWML) പൊളിച്ചുനീക്കിയത്. മാലിന്യ സംസ്കരണ പ്ലാന്റിനായി നീക്കിവെച്ച അഞ്ചേക്കറോളം വരുന്ന സർക്കാർ ഭൂമി കൈയേറി നിർമ്മിച്ചവയാണ് ഈ വീടുകളെന്നായിരുന്നു അധികൃതരുടെ വാദം. എന്നാൽ, മതിയായ നോട്ടീസ് നൽകാതെ കൊടും തണുപ്പിൽ തങ്ങളെ തെരുവിലിറക്കിയെന്ന് ആരോപിച്ച് താമസക്കാർ രംഗത്തെത്തിയിരുന്നു.
രാഷ്ട്രീയ പ്രതികരണങ്ങൾ
കേരള മുഖ്യമന്ത്രി പിണറായി വിജയൻ ഈ നടപടിയെ 'ബുൾഡോസർ രാജ്' എന്ന് വിശേഷിപ്പിച്ച് വിമർശിച്ചിരുന്നു. മുസ്ലിം ലീഗ് പ്രതിനിധി സംഘവും ഗ്രാൻഡ് മുഫ്തി കാന്തപുരം എ.പി. അബൂബക്കർ മുസ്ലിയാരും സംഭവത്തിൽ ആശങ്ക അറിയിക്കുകയും പുനരധിവാസം ആവശ്യപ്പെടുകയും ചെയ്തിരുന്നു.
സർക്കാരിന്റെ നിലപാട്
കുടിയൊഴിപ്പിക്കപ്പെട്ട സ്ഥലം മനുഷ്യവാസത്തിന് യോഗ്യമല്ലെന്നും എന്നാൽ മാനുഷിക പരിഗണന വച്ച് അർഹരായവർക്ക് രാജീവ് ഗാന്ധി ഹൗസിംഗ് സ്കീം വഴി പുനരധിവാസം ഉറപ്പാക്കുമെന്നും ഉപമുഖ്യമന്ത്രി ഡി.കെ. ശിവകുമാർ വ്യക്തമാക്കി. കുടിയൊഴിപ്പിക്കപ്പെട്ടവരിൽ ഭൂരിഭാഗവും ഇതരസംസ്ഥാന തൊഴിലാളികളാണെന്നും ഇവർക്ക് താൽക്കാലിക താമസസൗകര്യവും ഭക്ഷണവും ഉറപ്പാക്കാൻ ഉദ്യോഗസ്ഥർക്ക് നിർദ്ദേശം നൽകിയിട്ടുണ്ടെന്നും മുഖ്യമന്ത്രിയും അറിയിച്ചു.