മുംബൈ: ബോളിവുഡ് ഗായിക കനിക കപൂർ അടുത്തിടെ ഒരു പാർട്ടിയിൽ പങ്കെടുത്തപ്പോൾ കയ്യിൽ കരുതിയ വ്യത്യസ്തമായ ബാഗാണ് ഇപ്പോൾ സോഷ്യൽ മീഡിയയിലെ പ്രധാന ചർച്ചാവിഷയം (Kanika Kapoor Louis Vuitton Paint Can Bag). ലോകപ്രശസ്ത ലക്ഷ്വറി ബ്രാൻഡായ ലൂയി വിറ്റോണിന്റെ ‘പെയിന്റ് കാൻ’ ബാഗുമായാണ് താരം എത്തിയത്. ഏകദേശം 1.9 ലക്ഷം രൂപ വിലമതിക്കുന്ന ഈ ബാഗിനെ കണ്ടാൽ ഒരു പെയിന്റ് ഡബ്ബയാണെന്നേ തോന്നു.
ബണ്ടി സജ്ദേയുടെ വീട്ടിൽ നടന്ന പാർട്ടിയിലാണ് കനിക ഈ അപൂർവ്വ ബാഗുമായി എത്തിയത്. വെളുത്ത ടീഷർട്ടും ഡെനിമും ചുവന്ന ലെതർ ജാക്കറ്റുമായിരുന്നു താരത്തിന്റെ വേഷം. ഇതിനൊപ്പം കയ്യിൽ കരുതിയ ബാഗ് പെയിന്റ് ടിന്നിനോട് സാദൃശ്യമുള്ളതായിരുന്നു. ലൂയി വിറ്റോണിന്റെ 2022-ലെ കളക്ഷനിൽ ഉൾപ്പെട്ടതാണിത്. അന്തരിച്ച ഡിസൈനർ വിർജിൽ അബ്ലോയുടെ അവസാന സൃഷ്ടികളിലൊന്നായ ഈ ബാഗ് പർപ്പിൾ നിറത്തിലുള്ളതാണ്. ബാഗ് തുറന്ന് അതിലെ ലിപ്സ്റ്റിക്, പണം തുടങ്ങിയവ താരം ക്യാമറയ്ക്ക് മുന്നിൽ കാണിക്കുകയും ചെയ്തു.
വീഡിയോ പുറത്തുവന്നതോടെ വലിയ രീതിയിലുള്ള പരിഹാസമാണ് സോഷ്യൽ മീഡിയയിൽ ഉയരുന്നത്. “ഇതെന്താ ഉച്ചഭക്ഷണം കൊണ്ടുപോകുന്ന പാത്രമാണോ?”, “പെയിന്റ് അടിക്കാൻ പോവുകയാണോ?”, “ഏഷ്യൻ പെയിന്റ്സിന്റെ ഡബ്ബ പോലുണ്ട്” എന്നിങ്ങനെ പോകുന്നു കമന്റുകൾ. കൗതുകകരമായ ഡിസൈൻ ആണെങ്കിലും ഇതിന്റെ ഉയർന്ന വിലയും രൂപവുമാണ് ട്രോളുകൾക്ക് കാരണമായത്. നീല, ചുവപ്പ്, മഞ്ഞ തുടങ്ങി ആറ് വ്യത്യസ്ത നിറങ്ങളിൽ ഈ ബാഗ് ലഭ്യമാണ്. ഗായികയുടെ ഫാഷൻ പരീക്ഷണത്തെ അനുകൂലിച്ചും ചിലർ രംഗത്തെത്തിയിട്ടുണ്ട്.
